Tags-Ghar

ḳhayāl meñ hai jo chehra nazar bhī aa.egā
vo apne ghar se kabhī mere ghar bhī aa.egā

sabhī na ghar ke darīchoñ se bach ke guzreñge
havā kā koī to jhoñkā idhar bhī aa.egā

mirī navā to kabhī rā.egāñ nahīñ jaatī
agar vo ghar meñ huā baam par bhī aa.egā

maiñ ye samajh gayā ki vo ghar meñ nahīñ hai aaj
darbāñ ne ḳhud hī khol diyā dariyā kahe baġhair

aks ne ā.īne kā ghar chhoḌā
ek saudā thā jis ne sar chhoḌā

dhuul uḌtī hai dhuup baiThī hai
os ne āñsuoñ kā ghar chhoḌā

khiḌkiyāñ pīTtī haiñ sar shab bhar
āḳhirī fard ne bhī ghar chhoḌā

abhī itrā rahe haiñ ssakinān-e-qasr-shāhī
abhī āñkhoñ se un ke mahv ghar afsos kā hai

fazā kā lafz hai us ke liye alag maujūd
jo ghar Thahartī hai us ko havā nahīñ kahte

ghar meñ mehmāñ huī hai tanhā.ī
bhar gayā hai bar-āmda merā

apnī hī zaat meñ haiñ sab mahsūr
apnā apnā har ek kā ghar hai

āshnā hone se pahle ajnabī-pan khā gayā
ghar se pahle rāste meñ ghar kī rahdārī paḌī

samajh se kaam jo letā har ek bashar 'tābāñ'
na hāhā-kār hī machte na ghar jalā karte

aa baso dil kī tarah ghar meñ bhī ai ḳhush-ilhān
zindagī bhar ko mirā sāz-e-tarab ban jaao

ġhair ko raah ho ghar meñ tire sub.hān-allāh
aur ham duur se dar ko tire takte jāveñ

paḌe haiñ band sabhī ziine un chhatoñ ke 'zubair'
jahāñ jahāñ se tirā ghar dikhā.ī detā hai

us ghar kī vus.at kyā kahnā
tum jaisā ḳhush-qad hai dil meñ

qarār-e-jāñ hai tumhārā va.ada ki ghar pahuñch kar maiñ bhej dūñgī
maiñ muntazir hoñ tumhāre ḳhat kā shikāyatoñ kā javāb likhnā

apne ghar meñ rah kar bhī
us ke ghar meñ rahtī huuñ

parā.e logoñ ne tai kar liyā safar merā
ki mere paañv se lipTā rahā hai ghar merā