Tags-Ghar

aa.ina dekh ke niklā thā maiñ ghar se bāhar
aaj tak haath meñ mahfūz hai patthar merā

dil merā jalāyā kyā afsos hazār afsos
barbād kiyā ai but allāh kā ghar tū ne

zarā sochā to kyā kyā zehn se manzar nikal aa.e
mire ehsās ke kuchh khañDaroñ se ghar nikal aa.e

ye aalam hai ki jab bhī ghar meñ kuchh DhūñDne baiThā
purāne kāġhazoñ se yaad ke manzar nikal aa.e

ayyām sirf shām-o-sahar ho ke rah ga.e
kaise ajiib log the ghar ho ke rah ga.e

añdherī raat kā manzar hamesha rahtā hai
kiran ujāle kī ghar meñ kabhī kabhī aa.ī

mere dil meñ ghar bhī banātā rahtā hai
aur dil par nashtar bhī chalātā rahtā hai

tajā ghar ek aur saare bayābāñ kā huā vāris
koī majnūñ sā ayyārā na hogā dūsrā hargiz

ghar banāne meñ tamām ahl-e-safar lag ga.e haiñ
kyā tamāshe ye sar-e-rāhguzar lag ga.e haiñ

kaisī afvāh uḌī tujh se mire rishte kī
sab tire chāhne vaale mire ghar lag ga.e haiñ

be-vaqt agar jā.ūñgā sab chauñk paḌeñge
ik umr huī din meñ kabhī ghar nahīñ dekhā

mahbūb kā ghar ho ki buzurgoñ kī zamīneñ
jo chhoḌ diyā phir use muḌ kar nahīñ dekhā

na nazar se koī guzar sakā na hī dil se malba haTā sakā
na vo dar bachā na vo ghar bachā tere ba.ad koī na aa sakā

mire saath sū-e-junūn chal mire zaḳhm khā mirā raqs kar
mire sher paḌh ke milegā kyā patā paḌh ke ghar koī pā sakā?

havāoñ se uljhe shajar rāt-bhar
laraztā rahā merā ghar rāt-bhar

mānind-e-mulk-e-rome luTī ghar kī saltanat
yāroñ ye sāneha mujhe bhūlā nahīñ abhī

sadā hai is āh-o-chashm-e-tar se falak pe bijlī zamīñ pe bārāñ
nikal ke dekho tum apne ghar se falak pe bijlī zamīñ pe bārāñ

tumheñ jis ke liye ham ne chunā vo kaam bhī karnā
mile tum ko agar fursat hamārā ghar jalāne se

palkoñ pe larazte rahe aañsū kī tarah ham
ghar meñ tire mahkā kiye ḳhushbū kī tarah ham

rekhā hai khiñchī aur na hai siitā koī ghar meñ
is shahr meñ kyuuñ phirte haiñ sādhū kī tarah ham