Tags-Ghar

ye dushman kā makān apnā hī ghar hai
lagā deñ aap be-ḳhauf-o-ḳhatar aag

ḳhvāhish-e-bāl-o-par meñ rahtā hai
mutma.in kaun ghar meñ rahtā hai

mujh se sāhil kī mohabbat chhīn le
mere ghar ke biich ik naddī nikāl

TuuTe ghar meñ vo thakā haarā kabūtar sar-e-shām
ghoñsla DhūñDne aayā to mujhe yaad aayā

ruuTh kar aañkh ke andar se nikal jaate haiñ
ashk bachchoñ kī tarah ghar se nikal jaate haiñ

dar-o-dīvār mo.attar hoñ tirī ḳhushbū se
dil meñ mat aa magar ik baar mire ghar tak aa

ye dekh lenā mohalle ke log kaise haiñ
phir is ke ba.ad hī ta.amīr apnā ghar karnā

ye terā merā jhagḌā hai duniyā ko biich meñ kyuuñ Dāleñ
ghar ke andar kī bātoñ par ġhairoñ ko gavāh nahīñ karte

hameñ bhī ab dar o dīvār ghar ke yaad aa.e
jo ghar meñ the to hameñ ārzū-e-sahrā thī

na ham vahshat meñ apne ghar se nikle
na sahrā apnī vīrānī se niklā

raat ke pichhle pahar ai 'ayyāz'
ghar ko aane kī ādateñ na ga.iiñ

ghar ke ghar jalte the paḌe tere
dāġh-e-dil dekhe bas chaman dekhā

vo jo pardes jā rahā hai 'nasīm'
us kī āñkhoñ meñ apnā ghar rakh de

ghar kī sūrat jo bhī ho us par hirāsāñ maiñ nahīñ
dar muqaffal haiñ to dīvāroñ se larzāñ maiñ nahīñ

kaun sā taarā us kā ghar hai soch rahā thā maiñ
raat parī āñgan meñ utrī dil meñ qaid huī

āvāra bādal the ham bhī kyā karte āḳhir
ek kiran ghar meñ le aa.ī dil meñ qaid huī

paañv us ke bhī nahīñ uThte mire ghar kī taraf
aur ab ke rāsta badlā huā merā bhī hai

qahr kyā TuuT paḌā raat ko is bastī par
aise jhulse jo nazar aate haiñ ghar ghar chehre

pahle tum the makīñ magar ab to
dil hai muddat se ghar udāsī kā

chhup chhup kar tum raat ko sāhib ġhairoñ ke ghar jaate ho
kaisī hai ye baat kaho to kyūñ-kar muñh dikhlāte ho