Tags-Ghar

mere ghar koī ḳhushī aatī to kaise aatī
umr-bhar saath rahā dard mahājan kī tarah

ab phaTā jaama gazī kā nahīñ gar hai bhī koī
tū nikāle ko nikaltā nahīñ ghar se paivand

sad ḳhānumāñ-ḳharāb haiñ har har qadam pe dafan
kushta huuñ yaar maiñ to tire ghar kī raah kā

ba.ad marne ke ghar nasīb huā
zindagī ne to kuchh diyā hī nahīñ

phal pheñk ke hamsā.e ke ghar tañg karegā
ik roz ye āñgan kā shajar tañg karegā

ek hī dhartī ham sab kā ghar jitnā terā utnā merā
dukh sukh kā ye jantar-mantar jitnā terā utnā merā

patā ab tak nahīñ badlā hamārā
vahī ghar hai vahī qissa hamārā

kuchh vaqār-e-dar-o-dīvār nahīñ
ho makīñ ghar meñ to ghar lagtā hai

tum raah meñ chup-chāp khaḌe ho to ga.e ho
kis kis ko batāoge ki ghar kyuuñ nahīñ jaate

mausam-e-gul bhī mire ghar aayā
jaane vaalā na palaT kar aayā

kal isī ghar meñ ġhazal us ne sunā.ī hogī
jānī-pahchānī sī ḳhushbū dar-o-dīvār meñ hai

kaheñ bhī ab nahīñ merā Thikānā
ki ik ik ghar hai band ek ek dar band

na kyuuñ taklīf ho armāñ ko dil meñ
kahāñ jaa.e kidhar jaa.e hai ghar band

na jaane kab ruḳh havā badal de bhaḌak uTheñ phir vo bujhte sho.ale
hirās hai vo fazā pe taarī kahīñ bhī mahfūz ghar nahīñ hai

paañv rakhiye sambhal ke bastī meñ
ghar meñ kuchh sā.ebān meñ kuchh hai

akele ghar meñ kaise vaqt kāTo.ge tan-e-tanhā
koī tasvīr laTkā kar sar-e-dīvār-e-jāñ rakhnā

bulā rahī hai mujhe apne ghar kī vīrānī
miyān-e-shor-e-salāsil machal rahā huuñ maiñ

kaisī añdherī shaam thī us din
bādal bhī ghar kar chhāyā thā

bhīgī bhīgī ḳhāmoshī meñ
maiñ tire ghar tak saath gayā thā

kab aaoge ye ghar ne mujh se chalte vaqt pūchhā thā
yahī āvāz ab tak gūñjtī hai mere kānoñ meñ