Tags-Ghar

kaisā aanā kaisā jaanā mere ghar kyā aaoge
ġhairoñ ke ghar jaane se tum fursat kis din paate ho

jis meñ koī dar hai na darīcha na makīñ hai
us ghar pe lagā.e hue pahre kī tarah huuñ

satāyā aaj munāsib jagah pe bārish ne
isī bahāne Thahar jaa.eñ us kā ghar hai yahāñ

ik yaad ghar meñ saa.e kī sūrat rahī 'fidā'
ik aks aa.ine ke darūñ mujh ko mil gayā

maiñ apne ghar meñ ḳhud apnoñ se baazī haar baiThā huuñ
abhī sīkhā nahīñ apnoñ meñ rahne kā hunar maiñ ne

zarūr paañv meñ apne hinā vo mal ke chale
na pahuñche aaj bhī ghar tak mire vo kal ke chale

isī meñ fat.h kā terī hai imkāñ
mujhe ghar meñ mire mahsūr kar de

jab āftāb ghar pe bulāyā thā shaam ne
kyā kyā diye the jin ko jalāyā thā shaam ne

kyā kyā ḳhushī thī va.ada-e-māh-e-tamām kī
ghar ko bhisht-zār banāyā thā shaam ne

na chashm-e-tar batātī hai na zaḳhm-e-sar batāte haiñ
vo ik rūdād jo sahme hue ye ghar batāte haiñ

khole hue gesū na dikhā.e mujhe sūrat
mehmān mire ghar na hue raat tumhārī

ghar ghar nachne naach rahe haiñ mahā-nagar ke tāloñ par
gaañv ke bārah-māsoñ meñ dam TuuT gayā mardangoñ kā

rājāoñ kā des thā ghar ghar hāthī jhūmā karte the
aaj vahī bhārat 'rahmānī' mulk hai bhūkoñ nañgoñ kā

na kyuuñ anjām-e-ulfat dekh kar aañsū nikal aa.eñ
jahāñ ko lūTne vaale ḳhud apnā ghar luTā baiThe

kisī buzdil kī sūrat ghar se ye bāhar nikaltā hai
mirā ġhussa kisī kamzor ke uupar nikaltā hai

phir achānak hī ham umr ke nā-tavāñ haath meñ aa.ina dekh kar ro paḌe
aaj tak bas yahī soch kar ḳhush rahe vo bulā.egā ham us ke ghar jā.eñge

ghar kī dīvār se girte hue roġhan kī tarah
ab mirī umr mire baal batā dete haiñ

yūsuf bhī laakh jaañ se ḳharīdār ho gayā
tū ghar meñ ġhul tirā sar-e-bāzār ho gayā

qanā.at umr-bhar kī ghar ke bām-o-dar pe rakkhī thī
maiñ zer-e-āsmāñ thā dhuup mere sar pe rakkhī thī

mire bachchoñ ne vo dastār bhī jaane kahāñ rakh dī
buzurgoñ kī nishānī thī abhī tak ghar pe rakkhī thī