Tags-Ghar

makānoñ ke nagar meñ ham agar kuchh ghar banā lete
to apnī bastiyoñ ko sovarg se baḌh kar banā lete

ġhanīmat hai ki jañgal ke usūloñ ko nahīñ maanā
vagarna āshiyānoñ ko ajā.ib-ghar banā lete

tū gayā thā DhūñDhne un ko kahāñ ve to 'hasan'
tere ghar meñ aa.e baiThe leTe so kar uTh ga.e

raah kī kuchh to rukāvaT yaar kam kar dījiye
aap apne ghar kī ik dīvār kam kar dījiye

jaatī haiñ tire ghar ko sabhī shahr kī rāheñ
lagtā hai ki sab log tirī samt ravāñ haiñ

dar-o-dīvār pe qabza hai udāsī 'nazīr'
ghar mirā ghar na rahā un ke chale jaane se

'nabīl' aaj vo sar pe savār haiñ mere
jo log ghar meñ basā.e the maiñ ne bāhar ke

tishna-labī kahīñ mujhe ġharqāb kar na de
thoḌī sī raushnī ke liye ghar hī jal na jaa.e

pāband-e-dair ho ke bhī bhūle nahīñ haiñ ghar
masjid meñ jā nikalte haiñ chorī-chhupī se ham

kisī kī bazm meñ jaane se fā.eda kyā hai
mire liye yahī behtar hai apne ghar meñ rahūñ

man ke āñgan meñ ḳhayāloñ kā guzar kaisā hai
ye chahaktā huā vīrān sā ghar kaisā hai

na apne-āp ko is tarah dar-ba-dar rakhte
palaT ke aate agar ham bhī koī ghar rakhte

kyā ho qasd nikal jaane kā ghar pā kar ab shaad hai kyā kyā
armāñ armāñ hasrat hasrat kis kī badaulat dil kī badaulat

dam se yūsuf ke jab ābād thā yāqūb kā ghar
charḳh kahtā thā ki ye bait-e-huzan kis kā hai

shāyad ab tak mujh meñ koī ghoñsla ābād hai
ghar meñ ye chiḌiyoñ kī chahkāreñ kahāñ se aa ga.iiñ

saath hai milnā agar chāhūñ to miltā bhī nahīñ
ek ghar meñ itnī dīvāreñ kahāñ se aa ga.iiñ

zindagī chhoḌ ne aa.ī mujhe darvāze tak
raat ke pichhle pahar maiñ jo kabhī ghar aayā

hañgāma-e-hastī se guzar kyuuñ nahīñ jaate
raste meñ khaḌe ho ga.e ghar kyuuñ nahīñ jaate

use Thahrā sako itnī bhī to vus.at nahīñ ghar meñ
ye sab kuchh jaan kar āvārgī se chāhte kyā ho

ghar lauT ke ro.eñge maañ baap akele meñ
miTTī ke khilaune bhī saste na the mele meñ