Tags-Haalaat

sūrat-e-hālāt hī par baat karnī hai agar
phir muḳhātab ho koī bhī anjuman koī bhī ho

zindagī ko kabhī tartīb mayassar na huī
ruḳh badalte rahe hālāt har ik gaam ke saath

hālāt kī masnad se utar jā.eñge ik din
arzānī-e-vahshat meñ hī mar jā.eñge ik din

ik duuje ko deñ ilzām
shāyad yuuñ badleñ hālāt

mushkil haiñ agar hālāt vahāñ dil bech aa.eñ jaañ de aa.eñ
dil vaalo kūcha-e-jānāñ meñ kyā aise bhī hālāt nahīñ

jaane kyā sūrat-e-hālāt raqam thī us meñ
jo varaq chaak huā us ko dobārā dekheñ

sirf logoñ ko hañsī aa.ī mire hālāt par
kyā batā.eñ be-sabab kañgāl rah kar kyā milā

zindagī aise bhī hālāt banā detī hai
log sāñsoñ kā kafan oḌh ke mar jaate haiñ

aaj aḳhbār kī ḳhabreñ bhī haiñ mashkūk 'farāz'
aa.ina sūrat-e-hālāt kā bhī TuuT gayā

ye to sad-shukr ḳhayāloñ ne tire khīñch liyā
maiñ to hālāt ke girdāb meñ aayā huā thā

ham apne-āp se rahte na be-ḳhabar to bhalā
hamārī sūrat-e-hālāt kyā huī hotī

ḳhuuñ kī bū aatī hai paiham sūrat-e-hālāt se
aañkh rotī hai lahū har surḳhi-e-aḳhbār par

pūchhne aatā nahīñ koī mire hālāt ab
maiñ vatan meñ ho gayā huuñ apne hī anjān sā

allāh kyā huā hai zom-e-ḳhud-etamādī
kuchh log de rahe haiñ hālāt kī duhā.ī

mahtāb ke hālāt bhī dekheñ to kabhī vo
is husn-e-do-roza pe jo itrā.e hue haiñ

vaqt guzregā to hālāt sudhar jā.eñge
vaqt ke qahr se anjān huā karte the

jo bhī hai sūrat-e-hālāt kaho chup na raho
raat agar hai to use raat kaho chup na raho

tar-ba-tar ho ga.e hālāt ke chehre 'āmir'
ahl-e-dāmān-e-ḳhirad par baḌī hairānī hai

hijr ke daur meñ hālāt badal jaate haiñ
phuul mar jaate haiñ sab paat badal jaate haiñ

nazreñ milā milā ke nazar pher pher ke
majrūh aur dil ke na hālāt kījiye