Tags-Haalaat

paañv hālāt kī giraft meñ haiñ
ishq sar par savār hai sāhab

barsoñ ġham-e-hālāt kī dahlīz pe kuchh log
gul kar ke diye zehnoñ ke ḳhvābīda rahe haiñ

biite hue lamhoñ ke jo girvīda rahe haiñ
hālāt ke hāthoñ vahī ranjīda rahe haiñ

be-ḳhabar haiñ vo mire hālāt se
nāla-e-dil kī rasā.ī dekh lī

jo roz kī hai baat vahī baat karo ho
bekār hī yaaro ġham-e-hālāt karo ho

hālāt kī bhīgī raat bhī hai jazbāt kā tez alaav bhī
maiñ kaun sī aag meñ jal jā.ūñ ai nukta-varo samjhāo bhī

āsmāñ chhūne kī ḳhvāhish ne hī baḳhshī parvāz
varna hālāt ne to kaaT diye par apne

hālāt kah rahe haiñ ki is daur-e-nau ke log
so.e hue nahīñ haiñ to bedār bhī nahīñ

phūloñ ne hañs ke Taal diyā vaqt par hameñ
kāñTā magar bahār ke hālāt kah gayā

ġham-e-jānāñ ġham-e-hastī ġham-e-hālāt 'shakīl'
kyā kahūñ kitnī balā.eñ haiñ mirī jaan ke saath

aks kuchh apnā hī ā.īna-e-hālāt meñ thā
saTpaTā.e hue jab dām-e-safar se nikle

ek ek shai badaltī ga.ī mere ās-pās
hālāt ne mujhe hī badalne nahīñ diyā

ab kyā socheñ kyā hālāt the kis kāran ye zahr piyā hai
ham ne us ke shahr ko chhoḌā aur āñkhoñ ko muuñd liyā hai

tanhā thī merī sāda-ravī sū-e-zindagī
phir saath mere gardish-e-hālāt ho ga.ī

aa.ina hālāt kā aa.egā jo bhī dekhne
koī umda sī ġhazal us ko sunā dī jā.egī

tab koī Duub ke paanī meñ fanā hotā hai
ḳhvāb jab talḳhī-e-hālāt meñ mar jaate haiñ

jaur-e-hālāt bhalā ho terā
chain miltā hai shanāsāoñ se duur

anā ko saḳhtī-e-hālāt aksar toḌ detī hai
isī Dar se kabhī fitrat meñ ḳhuddārī nahīñ rakhte

vaqt aur hālāt par kyā tabsira kiije ki jab
ek uljhan dūsrī uljhan ko suljhāne lage

apnī mahfil meñ agar mujh ko nahīñ pāoge
aise hālāt meñ tum aur bhī ghabrāoge