Tags-Haar

ik aur karbalā hai tire dar ke sāmne
apne lahū ko jiit le baazī ko haar kar

haar jā.egī yaqīnan tīrgī
gar musalsal raushnī zinda rahī

maiñ sach kahūñgī magar phir bhī haar jā.ūñgī
vo jhuuT bolegā aur lā-javāb kar degā

dil-o-jāñ kar ke fidā un ko banāyā apnā
ishq ke khel meñ jiit apnī huī haar ke ba.ad

pukārtā thā mujhe pyaar se jo bū-e-gulāb
usī ne kāñToñ kā pahnā diyā hai haar mujhe

jo is vaqt jañgal meñ buuTī jaḌī hai
so vo nau-lakhā haar pahne khaḌī hai

aap hī thak-hār kar apne ko behis kar liyā
zindagī kab tak tirī be-e'tinā.ī dekhte

ek din ho jā.ūñgā tere gale kā haar maiñ
sūñghne ko mat liyā kar haath meñ jis tis ke phuul

yuuñ bhī kiyā hai ham ne haq-e-dilbarī adā
apnī hī jiit apne hī hāthoñ se haar dī

use patā hī nahīñ hai ki pyaar kī baazī
jo haar jaa.e vahī kāmyāb hotā hai

ye us kā apnā tarīqa hai daan karne kā
vo jis se shart lagātā hai haar jaatā hai

yārān-e-be-bisāt ki har bāzī-e-hayāt
khele baġhair haar ga.e maat ho ga.ī

haar kar jis ne kiyā hai us se samjhautā 'farāz'
haañ usī ke vāste hamvār duniyā ho ga.ī

dar-ba-dar hai to kahīñ jī nahīñ lagtā hogā
vo bhī din aa.egā thak-hār ke ghar jā.egā tū

haar ko to hārnā hai ek din
tab tak kar lo koshisheñ hazār

hādisa saḳht thā jāñkāh thā ab ke yaaro
varna ham ne to kabhī haar nahīñ maanī thī

chehroñ ko pairoñ se kuchal kar aage baḌh jaanā
jiit isī ko kahte haiñ to phir maiñ haar gayā

Darne vāloñ ko duniyā Darātī rahī Darne vāloñ ko duniyā Darātī rahe
tum Daroge na duniyā se lekin agar haar kar tum se duniyā hī Dar jā.egī

aisī shikast thī ki kaTī uñgliyoñ ke saath
kāñToñ kā ek haar pironā paḌā mujhe

yūñhī rukā thā dam lene ko, tum ne kyā samjhā?
haar nahīñ maanī thī bas sustāne baiThā thā