Tags-Haar

kitne arbāb-e-himmat ne un ke liye baḌh ke maidān meñ jaan bhī haar dī
ab bhī un kī nigāhoñ meñ hai bad-zanī ab bhī un ko vafā kī sanad chāhiye

hañs ke jī-bhar ke zamāne ki junūñ haar gayā
nāsehā ḳhush ho ki ham kū-e-butāñ chhoḌ aa.e

tujhe ḳhabar hī nahīñ mere jītne vaale
tire liye to hamesha hī haar jaanā thā

tum hī kaho ki vaqt se kyuuñ haar maan luuñ
jab ruuh meñ umañg hai dil bhī javān hai

ummīdoñ kā ik haar ban TuuT gayā
dil jaise koī aabla thā phuuT gayā

kyuuñ ham ne haar maan lī kyuuñ Daal dī sipar
ye sāneha shikast ke elaan meñ nahīñ

tum se mujh ko shikva kyuuñ ho āḳhir baasī phūloñ ko
kaun gale kā haar banā.e kaun aisā dīvāna hai

haar dekhā bhī ḳhūn-e-āshiq kā
aap aur sar jhukā.e baiThe haiñ

tum bhī haare merī haar
jaane kyā kyā ḳhatm huā

is haar meñ hai haath tumhārā bahut ġhalat
tum ne kiyā hai faisla saarā bahut ġhalat

maiñ khel haar chukā huuñ tirī sharākat meñ
ki tū ne maat ke ḳhāne meñ rakh liyā hai mujhe

ek ik phuul ko ek ek kalī ko dekhā
haar meñ un ke hamārā dil-e-nāshād nahīñ

muḳhtasar ye batā sar-ba-kaf kaun thā
jiit apnī jagah haar apnī jagah

ḳhvāhisheñ thak-hār ke ruḳhsat huiiñ
bojh saare Dho chuke ab ghar chalo

raste meñ dil haar aa.e haiñ
ḳhaak kaheñ rūdād safar kī

jaan de kar jaan lī tū ne bhalā ye kyā kiyā
terī qurbānī huī mere gale kā haar dekh

bin haar aa.e gul-ruḳhāñ tere gale paḌne katīñ
jiitā to baare husn ke mizmār kī saugand hai

thā merī saut pe pahra ''anā-sipāhī'' kā
maiñ apnī haar kā iqrār kis tarah kartā

haar to us ke gale ke na bane ashk mire
dil ko baale hī kā durdāna banāyā hotā

tumhārī zulf kā har taar mohan
huā mere gale kā haar mohan