Tags-Haar

haar diyā hai ujlat meñ
ḳhud ko kis āsānī se

ḳhudā muaaf kare saare munsifoñ ke gunāh
ham hī ne shart lagā.ī thī haar jaane kī

ham jo TuuTe haiñ batā haar bhalā kis kī huī
zindagī terī uThā.ī huī saugand the ham

mire dost tujh ko hai kyā patā tujhe de rahe haiñ jo mashvara
yahī log jashn manāeñge mirī jiit par tirī haar par

māthe pe lagā sandal vo haar pahan nikle
ham khīñch vahīñ qashqa zunnār pahan nikle

din bhar kī mashaqqat se thak haar ke ghar jaa.eñ
aur apnī hī dastak kī āvāz se Dar jaa.eñ

nahīñ tauq pahne hai qumrī ki hai ab
ye zeb-e-gulū-band o hār-e-garebāñ

'nabīl' is ishq meñ tum jiit bhī jaao to kyā hogā
ye aisī jiit hai pahlū meñ jis ke haar chaltī hai

haar ke zaḳhm kabhī jiit kī lazzat bhī kabhī
ham tasavvur meñ ka.ī khel rachā karte haiñ

hijr aaseb hai aaseb bhī aisā sāhab
hausla haar gayā maiñ bhī sikandar vaalā

ab to ye jism bhī jaatā nazar aatā hai mujhe
ishq ab chhoḌ mirī jaan ki maiñ haar gayā

yūñhī rukā thā dam lene ko, tum ne kyā samjhā?
haar nahīñ maanī thī bas sustāne baiThā thā

milegā tohfa-e-dil ke evaz nashāt ki ġham
kise ḳhabar hai ki jiit aa.e ham ki haar aa.e

mire huzūr ye loTe hai terī chhātī par
jo pahuñche haath to badlā guloñ ke haar se luuñ

mujhī meñ Duub gayā dushmanī nibhāte hue
ḳhudā bhī haar gayā mujh ko āzmāte hue

hañs ke kahte haiñ bosa-bāzī meñ
jiit bhī apnī haar kī sī hai

phir kis kī yaad aa.ī ki 'anvār' āj-kal
motī piro rahā huuñ garebāñ ke haar meñ

maiñ to apnī jaan pe khel ke pyaar kī baazī jiit gayā
qātil haar ga.e jo ab tak ḳhuun ke chhīñTe dhote haiñ

batāo to ye rahegā visāl meñ kab tak
hamāre haath ke badle gale kā haar lihāz

haar kyuuñ us ke gale kā maiñ na huuñ zar-gar ne
kī hai zanjīr gale kī tire bhārī tayyār