Tags-Haar

tū yahīñ haar gayā hai mire buzdil dushman
mujh se tanhā ke muqābil tirā lashkar niklā

jo be-gharī ke dukhoñ se tum bhī udaas ho jaao haar jaao
to āñsuoñ se makāñ banānā aur us ke uupar sahāb rakhnā

bāzī-e-husn-o-ishq meñ kuchh haar hai na jiit
nazreñ milīñ diloñ kā ḳhazāna badal gayā

sar jhukāyā hai mohabbat meñ mohabbat ke liye
is mohabbat ko mirī haar na jaane koī

juuñ jānūñ be-kasoñ ke ta.iiñ ab nibāh lo
ham sab taraf se haar tumhāre gale paḌe

hazār ma.arke sar kar ke log haar ga.e
husain-ibn-e-alī! fat.h to tumhārī thī

haar jā.egī zindagī lekin
hārne kā nahīñ mirā ye ishq

tumhārī jiit ke badle
maiñ ḳhud ko haar saktā huuñ

bāñheñ tan kā haar huiiñ sab lamhe bane gulāb
bulbul ne ik giit sunāyā aur shahnā.ī shaam

hārne vaale hai duā merī
merī har jiit haar ho jaa.e

hamāre ishq aur un ke taġhāful kā ye aalam hai
ki ham dil haar baiThe haiñ vo lene haar leTe haiñ

shīshoñ se haar kar talab-e-sañg meñ koī
simTe to reza reza bikhar jaa.e shahr meñ

us ne hī diye zaḳhm ye gardan pe hamārī
phir us ne hī pahnā.e hameñ haar namak ke

vo jis ne ashkoñ se haar nahīñ maanī
kis ḳhāmoshī se dariyā meñ Duub ga.ī

kisī habīb ne lafzoñ kā haar bhejā hai
basā ke itr meñ dil kā ġhubār bhejā hai

merī tanhā.ī se tañg aa ke mire hī ghar ne
aaj thak-hār ke dahlīz pe āñkheñ rakh diiñ

ḳhudāyā dard ko de aur shiddat
ki maiñ ab haar jaanā chāhtā huuñ

qarīb aa ki ujāloñ ke haar pahnā duuñ
mujhe asīr-e-shab-e-lā-zavāl kartā jā

zindagī kitnā āzmā.egī
āḳhirash vo bhī haar jā.egī

maiñ to baazī haar kar be-fikr ho kar chal diyā
jītne vāloñ ko chaskā lag gayā achchhā nahīñ