Tags-Haar

hamārā dil vo gul hai jis ko zulf-e-yār meñ dekhā
jo zulfeñ ho ga.iiñ barham gale ke haar meñ dekhā

chheḌte haiñ pā ke mauqa un ke utre haar bhī
bante haiñ kyuuñ dil hamārā phuul murjhāne ke ba.ad

ajiib sehr thā dil ke qimār-ḳhāne meñ
tab uTh ke aa.e ki hastī bhī haar dī ham ne

is kī āñkhoñ pe vaar deñ āñkheñ
ik nazar hī meñ haar deñ āñkheñ

jis ne nafrat hī mujhe dī na 'zafar' pyaar diyā
maiñ ne sab kuchh use kyuuñ haar diyā vaar diyā

ajiib ek muamma hai ishq bhī 'jagdīsh'
kabhī ye jiit kabhī sirf haar jaisā hai

maiñ dil to haar chukā jān-o-māl hāzir haiñ
'ḳhalish' ke paas hai kyā aur jān-o-māl ke ba.ad

na jaane haar hai yā jiit kyā hai
ġhamoñ par muskurānā aa gayā hai

khel zindagī ke tum khelte raho yaaro
haar jiit koī bhī āḳhirī nahīñ hotī

pahlā maqsad hai khelnā tum se
sānvī jiit haar hai sāhab

ek lamha jise maiñ haar chukā
kaise kah duuñ vo merā thā hī nahīñ

shā.irī meñ bāzuoñ ke saath dil bhī shal huā
āḳhirash majbūr ho kar haar dī ye race bhī

āḳhir ko thak-hār ke mujh ko zamīn par aanā hai
zor-o-shor-e-bāzū kaisā shahpar-vahpar kyā

nigāheñ us ke chehre se nahīñ haTtīñ jo dekhūñ
ki hai us ke gale meñ besh-qīmat haar koī

zad meñ aate rahe tere shah-o-farzīñ kyā kyā
apnī jiitī huī baazī ko mirī haar se dekh

raat kā pahnā haar jo ab tak din ko utārā un ne nahīñ
shāyad 'mīr' jamāl-e-gul bhī us ke gale kā haar hai aaj

mire mizāj kī shiddat se tum to vāqif ho
tumheñ maiñ apnā banā kar bhī haar saktā huuñ

charāġh haath meñ thā tiir bhī kamān meñ thā
maiñ phir bhī haar ga.ī tū jo darmiyān meñ thā

ye hotā hai jo himmat haar baiTho
ki baḌh-chaḌh kar musībat boltī hai

abhī sumūm ne maanī kahāñ nasīm se haar
abhī to ma.arka-hā-e-chaman kuchh aur bhī haiñ