Tags-Hasrat

ek hasrat meñ huā itnā mujhe rañj ki maiñ
haath aa.ī huī duniyā ko gañvā dene lagā

hasrat-e-dīd meñ guzarāñ haiñ zamāne kab se
dasht-e-ummīd meñ gardāñ haiñ divāne kab se

tere andāz-e-sitam tere taġhāful ke nisār
dil meñ ik hasrat-e-benām-o-nishāñ baaqī hai

dil ko hasrat hai tire milne kī
aur hālāt pe qaabū bhī nahīñ

tañg aa ke mohabbat tark na kī ham garche rahe nākām sadā
sarshār the lazzāt-e-hasrat-o-ġham se hote bhalā bezār to kyā

maiñ vo ik jins-e-girāñ huuñ sar-e-bāzār ki bas
haath yuuñ milte haiñ hasrat se ḳharīdār ki bas

gardish-e-daurāñ se yahāñ kis ko farāġh aayā hai haath
haañ magar aayā to ik hasrat kā daaġh aayā hai haath

hasrat-e-ahd-e-vafā baaqī hai
terī āñkhoñ meñ hayā baaqī hai

de daad ai falak dil-e-hasrat-parast kī
haañ kuchh na kuchh talāfī-e-māfāt chāhiye

kaun hasrat-zada-e-shauq-e-takallum hai yahāñ
laḌkhaḌātā hai tirī chashm-e-suḳhan-go kā fusūñ

is qadar hai hasrat-e-nākām kā 'rāhī' ġhubār
naqsh-pā-e-ārzū bhī be-nishāñ hone ko hai

jaane kyā ḳhud ko samajh rakkhā hai
ye jo hasrat hai ki rusvā hote

ġham-o-alam ranj-o-yās-o-hasrat uThā.ūñgā sab ke ruḳh se parde
tumheñ qasam hai dil hazīñ kī uThāo to tum naqāb pahle

hasrat-e-nashsha-e-vahshat na ba-sa.i-e-dil hai
arz-e-ḳhamiyāza-e-majnūñ hai garebāñ merā

jānib-e-dar nigāh-e-hasrat hai
kis kī kartī hai intizārī aañkh

ḳhaak uḌtī hai dil-e-vīrāñ meñ ab rakkhā hai kyā
yaas sab kuchh le ga.ī armān-o-hasrat luuT kar

pur-armān ahbāb duniyā se uTThe
falak ne nikālī na hasrat kisī kī

vaah kyā aalam ajab hai intizār-e-yār kā
naam hai dīdār-e-hasrat hasrat-e-dīdār kā

uThā le haath mire chāragar ki is dil meñ
salīb-e-hasrat-e-ġham mustaqil gaḌī huī hai