Tags-Hasrat

ai ḳhaar ḳhār-e-hasrat kyā kyā figār haiñ ham
kyā haal hogā us kā jis dil meñ ḳhaar haiñ ham

sabz baaġh aatā hai duniyā kā nazar jab 'ra.anā'
yaad aatī hai bahut hasrat-e-shaddād mujhe

bāb-e-hasrat dāstān-e-shauq tasvīr-e-umīd
lamha lamha zindagī aurāq ulaTtī jaa.e hai

hasrat se sū-e-dar ye take jaanā tā bike
an-thak ke chor āñkhoñ ko ab sone dījiye

marte hue vajūd kī hasrat tamām-shud
sāñsoñ se lipTī āḳhirī chāhat tamām-shud

kūcha-e-yār meñ apnā jo guzar hotā hai
nigarāñ rahte haiñ hasrat se dar-o-bām ko ham

hasrat-e-dil nā-mukammal hai kitāb-e-zindagī
joḌ de maazī ke sab aurāq mustaqbil ke saath

tirchhī nazar se dekhiye talvār chal ga.ī
zaḳhm-e-jigar kī raah se hasrat nikal ga.ī

zindagī ye hai ki bā-īñ-hama-saudā-e-safar
zindagī hasrat-e-yak-gām huī jaatī hai

nargis kī tarah ḳhaak merī ugeñ haiñ chashm
Tuk aan ke ye hasrat-e-dīdār dekhnā

dil kī dil hī meñ rahī ye hasrat-e-dīdār bhī
merī nazreñ uThte hī vo mujh se sharmā jaa.e hai

tamannā-e-dīdār hai hasrat-e-dil ki tum jalva-farmā ho maiñ āñkheñ sekūñ
na kah denā muusā se jaise kahā thā mirī arz par lan-tarānī kaho to

ba-qadr-e-hasrat-e-dil chāhiye zauq-e-ma.āsī bhī
bharūñ yak-gosha-e-dāman gar āb-e-haft-dariyā ho

hasrat o yaas kī tasvīr chhanākā sā havā
aur phir haal ke phaile hue parde ke har ik silvaT par

jaan āñkhoñ meñ rahī jī se guzarne na diyā
achchhī dīdār kī hasrat thī ki marne na diyā

lafz us shoḳh kā muñh dekh ke rah jaate haiñ
lab-e-iz.hār kī hasrat nahīñ dekhī jaatī

uzr-e-vāmāndagī ai hasrat-e-dil
naala kartā thā jigar yaad aayā

āḳhirī baar tujhe dekhnā hasrat hī nahīñ
marne vaale kī zarūrat bhī to ho saktī hai

vasī.a bazm-e-jahāñ hai to ho mujhe kyā kaam
jagah milī na mirī hasrat-dilī ke liye