Tags-Hasrat

vo ek bachcha hai hasrat se dekhtā hai mujhe
maiñ us ke haath meñ TuuTā huā khilaunā huuñ

dil kis kī teġh-e-nāz se lazzat-chashīda hai
har zaḳhm shauq se lab-e-hasrat-gazīda hai

zindagī ko na hai aarzū ko 'vafā' hasrat-āgīñ hai donoñ kā shahr-e-vafā
zindagī aarzū meñ guzar jā.egī aarzū dil meñ ghuT ghuT ke mar jā.egī

guzar ga.e vo jo jaañ se magar ye hasrat hai
koī 'sabā' se ye kah de miyāñ nahīñ guzre

nā-murādī se mire dil kī ḳhalish kam na huī
tishnagī aur baḌhī hasrat-e-nākām ke ba.ad

kyā kyā na pyaas jaage mire dil ke dasht meñ
hasrat bhī ek aag hai laage jo raat bhar

jo niklī hogī koī aarzū to ye bhī niklegā
tumhārā tīr-e-hasrat ban gayā dil meñ nihāñ ho kar

ghaTā.eñ ghir ke kyā kyā hasrat-e-farhād par roiiñ
chaman tak aa ga.iiñ nahreñ pahāḌoñ se ravāñ ho kar

tumheñ sāhil kī hasrat hai hameñ tūfāñ se laḌnā hai
chalo behtar kiyā tum ne kinārā kar liyā ham se

ek hasrat meñ Dhal ke Dastī hai
abr se bekalī barastī hai

hoveñge ḳhaak vus.at mashrabī kī rah ga.ī hasrat
ham avval hī se misl-e-dasht vīrāne hue hote

ab vo hasrat-e-rusvā ban kar juzv-e-hayāt hai barsoñ se
jis se vahshat karte the tum ab vo ḳhayāl-e-ḳhām kahāñ

muft barbād hai mirī hasrat
kyuuñ dil-e-be-qarār se niklī

rūh-e-kul se sab rūhoñ par vasl kī hasrat taarī hai
ik sar-e-hikmat barpā hai allāh-hū ke baaḌe meñ

sunī hai chaap bahut vaqt ke guzarne kī
magar ye zaḳhm ki hasrat hai jis ke bharne kī

baḌī hasrat se insāñ bachpane ko yaad kartā hai
ye phal pak kar dobāra chāhtā hai ḳhaam ho jaa.e

mire mazār ko samjhā na jaa.e ek mazār
hazār hasrat-o-armāñ kā ḳhud mazār huuñ maiñ

hasrat-e-dīd meñ āḳhir ko dam apnā ulTā
parda-e-chashm na us shoḳh ne apnā ulTā

khaḌe hoñ zer-e-tūbā vo na dam lene ko dam bhar bhī
jo hasrat-mand tere sāya-e-dāman ke baiThe haiñ

tum ko palkoñ beach chhupānā hasrat thī
tum ko palkoñ beach chhupānā bhuul ga.e