Tags-Hasrat

karnī hai to khul ke karo inkār-e-vafā kī baat
baat adhūrī rah jaa.e to hasrat rahtī hai

ek be-nām sī hasrat hai badan meñ baaqī
jis qadar qarz the shab ke vo adā ho bhī chuke

rang-e-hasrat kā tamāshā dekhnā thā gar tumheñ
raqs-e-āḳhir dekhte tum aa ke bismil ke qarīb

ḳhud-farebī ne be-shak sahārā diyā aur tabī.at ba-zāhir bahaltī rahī
ek kāñTā sā dil meñ khaTaktā rahā ek hasrat sī dil ko masaltī rahī

har ghaḌī kyuuñ na zalzale meñ rahe
mash.had-e-hasrat-o-vafā hai dil

terī ulfat kā naqd dāġh-e-jigar
merī hasrat kā ḳhūñ-bahā hai dil

merā nīñdoñ ke saath jhagḌā hai
ḳhvāb hasrat se dekhte haiñ mujhe

merī hasrat koī pūchhe mujh se merā hāl-e-dil
log apne apne shaidā.ī kise āvāz duuñ

ai jalva-e-jānāna phir aisī jhalak dikhlā
hasrat bhī rahe baaqī armāñ bhī nikal jaa.e

bas tū ne apne muñh se jo parda uThā diyā
hasrat nikal ga.ī dil-e-ummīd-vār kī

ye ishq par husn kī ināyat ye husn se ishq kī irādat
hamārī hasrat hai aur tū hai tirī javānī hai aur ham haiñ

kaun hasrat-zada-e-shauq-e-takallum hai yahāñ
laḌkhaḌātā hai tirī chashm-e-suḳhan-go kā fusūñ

kuchh nazar aatā nahīñ us ke tasavvur ke sivā
hasrat-e-dīdār ne āñkhoñ ko andhā kar diyā

isī hasrat meñ kaTī rāh-e-hayāt
koī do-chār qadam saath chale

dar-e-rahmat ḳhudā kā baaz hai dil apnā taaza rakh
qafas meñ hasrat-e-gul se mat itnā phaḌphaḌā bulbul

pistān-e-nau-damīda ne malvā.e ḳhuub haath
maiñ dāġh-e-hasrat-e-samar-e-ḳhām le gayā

ai 'jamīla' biThāo hasrat ko
vo bhī mehmān hai isī dil kī

tujh se mansūb hue haiñ to ye hasrat hī rahī
ham kabhī apne havāle se pukāre jaate

mātam-e-hasrat kiyā pahle garebāñ phaaḌ kar
phir duā dī dushmanoñ ko dast-e-be-shamshīr ne

ba.ad marne ke bhī chhoḌī na rifāqat merī
merī turbat se lagī baiThī hai hasrat merī