Tags-Hasrat

nasīb-var tumheñ to tauq-e-hasrat-e-fanā milā
hameñ to ḳhauf-e-lamha-e-visāl de diyā gayā

yaañ ummīd-e-qatl hī ne ḳhuuñ kiyā
rah ga.ī hasrat dil-e-jallād meñ

hasrat-e-dīd le ke hī jaañ se ga.e
shauq-e-dīdār ke jo the maare hue

yuuñ aaj phir ik hasrat-e-nākām pe ro.e
jaise na the pahle kabhī āzurda-diloñ meñ

ik tiir nahīñ kyā tirī mizhgāñ kī safoñ meñ
bah jaa.eñ lahū ban ke ye hasrat hai diloñ meñ

churātā hai vo kāfir aañkh mujh se
nigāh-e-chashm-e-hasrat dekh lī hai

shab-e-guzishta ke saaz o sāmāñ ke ab kahāñ haiñ nishān baaqī
zabān-e-shama-e-sahar pe hasrat kī rah ga.ī dāstān baaqī

hasrat hai koī ġhuncha hameñ pyaar se dekhe
armāñ hai koī phuul hameñ dil se pukāre

charāġh-e-hasrat-o-armāñ jalāo.ge kaise
havā-e-dahr to rah rah ke phūñk mārtī hai

merī un āñkhoñ ne jaise tujhe dekhā hī nahīñ
haa.e vo hasrat-e-dīdār kahāñ se lā.ūñ

chāhtā hai ki unheñ shām-o-sahar pyaar kare
dil-e-ma.asūm kī hasrat pe hañsī aatī hai

jo jism tamannā meñ sulagtā hai tumhārī
us jism meñ hasrat bharī ik raat to dekho

chashm-e-hasrat se jo Tapkī hai lahū kī ik buuñd
sub.h-e-ummīd kī tanvīr bhī ho saktī hai

kabhī aarzū thā yahī dāġh-e-hasrat
mujhe jo banā de tirī mehrbānī

us gul se arz-e-hāl kī hasrat hī rah ga.ī
kāñTe paḌe zabāñ meñ jo mail-e-bayāñ huā

yaas hai hasrat hai ġham hai aur shab-e-dījūr hai
itne sāthī haiñ magar tanhā dil-e-ranjūr hai

do-jahāñ meñ sirf ye hai ishq kī daulat 'saġhīr'
sīna-e-pur-dāġh chashm-e-tar dil-e-hasrat-ma.āb

palkoñ se chunūñ apnī kāñTe tirī rāhoñ ke
juuñ barg-e-gul hasrat rāhoñ meñ bikhar jā.ūñ

raste kī vahī mushkil manzil kī vahī duurī
aur dil kī vahī hasrat tā-hadd-e-nazar jā.ūñ

ab to hasrat hai ki barbād kiyā hai jis ne
us kā dīvāna mujhe kah ke pukārā jaa.e