Tags-Hasrat

ahl-e-dil hasrat-e-dil le ke tumhāre dar par
aaj kis bhes meñ aa.e haiñ tumheñ kyā ma.alūm

tirā dīdār ho hasrat bahut hai
chalo ki niiñd bhī aane lagī hai

ḳhaak hone ko hazāroñ hasrat
ḳhuun hone ko haiñ armān bahut

nahīñ ma.alūm hasrat se maiñ miTTī dekhtā huuñ kyoñ
mujhe shāyad ḳhabar hai kul mirī pahchān miTTī hai

kisī ke rū-ba-rū baiThā rahā maiñ be-zabāñ ho kar
mirī āñkhoñ se hasrat phuuT niklī dāstāñ ho kar

rashk-e-ishrat hai lazzat-e-hasrat
kuchh gunah meñ hai ne savāb meñ hai

ḳhayāl-e-dost na hasrat na aarzū na ummīd
ye dil hai ab kisī ujḌe hue chaman kī tarah

falsafa mere sahīfe meñ hai hikmat bhī hai
aarzū bhī mire āġhosh meñ hasrat bhī hai

jab khīñch liyā hai mujhe maidān-e-sitam meñ
dil khol ke hasrat bhī nikāle koī aa kar

fazā-e-nīl-gūñ meñ hasrat-e-parvāz to dekho
maiñ uḌne ke liye kāġhaz ke tayyāre banātā huuñ

baḌhā.e vādī-e-hasrat meñ kyā qadam koī
ki ḳhizr-e-rāh bhī gum aur raah bhī masdūd

kabhī zid hī nahīñ kartī koī hasrat mire dil kī
machaltī hai magar man kī lalak āhista āhista

aise labālab kab bhartā hai har ummīd kā kaasa
mujh ko hasrat se takte haiñ aane jaane vaale

har-chand ki afsos bichhaḌne kā hameñ thā
lekin mileñ ham phir kabhī hasrat bhī nahīñ thī

na zindagī se vo nafrat na maut kī hasrat
vo bad-duā.eñ rahīñ ab na vo duā.eñ rahīñ

ḳhaar ḳhār-e-alam-e-hasrat-e-dīdār to hai
shauq gul-chīn-e-gulistān-e-tasallī na sahī

jo hasrat-e-dil hai vo nikalne kī nahīñ
jo baat hai kaam kī vo chalne kī nahīñ

jaao bahāro jaao jaao vīrānoñ ke paas na aao
ālam-e-shauq-e-āsūda ko hasrat kā ġhammāz na samjho

ghaḌī jis kī hashr kā ek din shab-gor jis kā har ek pal
vo maze haiñ hasrat-e-marg meñ jo ḳhizr kī umr-e-darāz meñ

vo tū hai yaad tirī hai ki merī hasrat hai
ye kaun hai mire siine meñ siskiyāñ letā