Tags-Hasrat

aañkh jhapkī thī tasavvur bañdh chukā thā yaar kā
chauñkte hī hasrat-e-dīdār kā daftar khulā

apne dīdār kī hasrat meñ tū mujh ko sarāpā dil kar de
har qatra-e-dil ko qais banā har zarre ko mahmil kar de

mash.had-e-āshiq se kosoñ tak jo ugtī hai hinā
kis qadar yā-rab halāk-e-hasrat-e-pā-bos thā

ham shīsh ghar meñ apnā sarāpā na paḌh sake
hasrat rahī ki aa.ine ik baar bolte

jald mar ga.e tirī hasrat setī ham
ki tirā der kā aanā na gayā

hasrat-e-dīd nahīñ zauq-e-tamāshā bhī nahīñ
kaash patthar hoñ nigāheñ magar aisā bhī nahīñ

tire ishq meñ saath apne 'nasīr'
liye hasrat-o-dard-o-ġham ko chalā

kasī kī hālat-e-dil sun ke uTh ga.iiñ āñkheñ
ki jaan paḌ ga.ī hasrat bhare fasāne meñ

pas-e-nigāh-e-taġhāful thī ik nigāh ki thī
jo dil ke chehara-e-hasrat kī tāzgī hī rahī

terā lahja apnāyā ab dil meñ hasrat sī hai
apnī koī baat kabhī to apnī zabānī kahte

tire bīmār-e-ġham ko hai to bas hai
faqat ik hasrat-e-dīdār baaqī

āḳhir meñ ye hasrat hai ki batā
rehāna ke kitne bachche haiñ

dil le ke bhī 'ra.anā' kā kiyā paas na afsos
kuchh hasrat-e-dil tū ne na ayyār nikālī

āḳhir mirī turbat se ugī hai gul-e-nargis
kyā bād-e-fanā hasrat-e-dīdār nikālī

ab na agle valvale haiñ aur na vo armāñ kī bhiiḌ
sirf miT jaane kī ik hasrat dil-e-'bismil' meñ hai

tānā-bānā bunte bunte ham udhḌe
hasrat phir thak kar ġhash khā kar baiTh ga.ī

harīfoñ se ye qaul-e-'dīvāna' kah do
ġhazal hai jo hasrat to hasrat ġhazal hai

imroz-o-fardā karte rahe tum aur yahāñ ahl-e-hasrat
kitne hī kuchle jaate rahe bār-e-yaum-e-mī.ād tale

hasrat-e-faisla-e-dard-e-jigar baaqī hai
aur abhī silsila-e-shām-o-sahar baaqī hai

pahuñchā na koī murġh kabhū apne chaman tak
juz tā.ir-e-hasrat ki vo yaañ bāl-fishāñ hai