Tags-Hawa

vo achānak sāmne aayā to mujh ko yuuñ lagā
ḳhvāb thā jaise koī ta.abīr meñ Duubā huā

khīñch lā.eñge use 'jāved'-ahmad ek din
adl hai kis halqa-e-zanjīr meñ Duubā huā

vahshī mizāj az-bas mānūs bādya haiñ
un ke junūñ meñ jañgal apnā huā hai ghar sā

chal rahī hai baḌī shiddat se yahāñ sard havā
mujh ko bujhne se bachā soz-e-nihānī mujhe de

dekhegā aaj merī taraf kaun pyaar se
bujhtā huā charāġh huuñ patjhaḌ kā chāñd huuñ

gir jā.egī ye chhat jo chalī jhuum kar havā
'rāhī' mirī hayāt hai ik qasr-e-be-sutūñ

tū ne to mujh ko dekhā hai
maiñ hī havā kā vo jhoñkā huuñ jis ne akasr tere gesū uljhā.e haiñ

ḳhālī-az-hikmat huā 'bahrām' kab fel-e-hakīm
kaam kab hai dāvar-e-dādār kā fe.al-e-abas

Thokar se merā paañv to zaḳhmī huā zarūr
raste meñ jo khaḌā thā vo kohsār haT gayā

mahfil se maiñ uThā to ajab tabsira huā
kahne lagā ki ab ye hamārā nahīñ rahā

TuuTe ghuñghrū kī jo āvāz huā kartī hai
vo khanak kyuuñ mirī guftār meñ aa jaatī hai

saaqī Tuk ek mausam-e-gul kī taraf bhī dekh
Tapkā paḌe hai rañg chaman meñ havā se aaj

'sirāj' ab ghar tirā raushan huā hai
magar vo sham.a-rū mehmān pahuñchā

tīrgī kī kyā ajab tarkīb hai ye
ab havā ke dosh par diivā rakhā hai

abhī ye haal huā is pe kashtiyāñ guzrīñ
vo gaañv jis pe kabhī chhā.īñ badliyāñ bhī nahīñ

sulūk us ne mohabbat meñ vo kiyā 'bebāk'
huā jo ham se adāvat ke darmiyāñ bhī nahīñ

gahrā.iyoñ meñ zehn kī girdāb sā rahā
sāhil pe bhī khaḌā huā ġharqāb sā rahā

vo sitam na Dhaa.e to kyā kare use kyā ḳhabar ki vafā hai kyaa?
tū usī ko pyaar kare hai kyuuñ ye 'kalīm' tujh ko huā hai kyaa?

ye kahāñ se aa.ī hai surḳh-rū hai har ek jhoñkā lahū lahū
kaTī jis meñ gardan-e-ārzū ye usī chaman kī havā hai kyaa?

abhī terā daur-e-shabāb hai abhī kyā hisāb-o-kitāb hai
abhī kyā na hogā jahān meñ abhī is jahāñ meñ huā hai kyaa?