Tags-Hawa

vo jī rahā thā duāoñ ke saḳht narġhe meñ
hisār-e-zāt huā paash paash kaisā hai

jin se bedār huā lazzat-e-āzār kā zauq
choTeñ aisī bhī ka.ī khaa.e hue haiñ ham log

fasl-e-gul kī ḳhāsiyat ko kyā huā
shāḳh-e-dil par barg-o-bar aa.e nahīñ

apne dāman se havā dete raho
bujh na jaa.e ye sharār-e-zindagī

ye saarā faiz usī ātish-e-darūñ kā hai
huā hai kitnā añdherā nikhar rahā huuñ maiñ

nā-umīdī meñ bhī merī pur-umīdī dekhiye
vo huā mil kar judā ho kar judā mil jā.egā

achchhā huā niiñd aa ga.ī arbāb-e-vafā ko
aage ye kahānī bhī sunāne kī nahīñ thī

huā ye dil na jab merā to phir kyā aur kā hogā
bharosa kījiyo tum bhī na aise be-muravvat kā

jo paayā muġhbachoñ meñ tarz-e-e.ajāz-e-masīhā.ī
huā zāhid bhī qaa.il pīr-e-mai-kash kī karāmat kā

machā huā hai ḳhudāoñ kī an-kahī kā shor
magar vo guuñj ki khā jā.egī sabhī kā shor

mas.ala ḳhatm huā chāhtā hai
dil bas ab zaḳhm nayā chāhtā hai

jo us ne kiyā achchhā hī kiyā jo ham pe huā achchhā hī huā
ab girya-o-ġham kuchh chiiz nahīñ ab nāla-e-ġham kuchh baat nahīñ

chhoḌā na tujhe ne raam kyā ye bhī na huā vo bhī na huā
ham se to but-e-kāfir ba-ḳhudā ye bhī na huā vo bhī na huā

afsos adam se aa ke kiyā kyā ham ne gulshan-e-hastī meñ
juuñ shabnam-o-gul royā na hañsā ye bhī na huā vo bhī na huā

us ā.īna-rū ke vasl meñ bhī mushtāq-e-bos-o-kanār rahe
ai ālam-e-hairat tere sivā ye bhī na huā vo bhī na huā

dil kū-e-butāñ meñ jā baiThā dam ḳhāna-e-tan ko chhoḌ gayā
haif āḳhir-e-kār rafīq apnā ye bhī na huā vo bhī na huā

yā bahr-e-tavāf-e-ka.aba ga.e yā mo.atakif-e-but-ḳhāna hue
kyā shaiḳh o barhaman ham ne kiyā ye bhī na huā vo bhī na huā

ai qāsid-e-ashk o paik-e-sabā us tak na payām-o-ḳhat pahuñchā
tum kyā karo haañ qismat kā likhā ye bhī na huā vo bhī na huā

kheñch us ko na laayā jazba-e-dil tāsīr na kuchh naale hī ne kī
maiñ donoñ kā bas shākī hī rahā ye bhī na huā vo bhī na huā

us lab kā liyā bosa na kabhū haihāt na lipTā pāvoñ se
dil tujh se ba-rañg-e-pān-o-hinā ye bhī na huā vo bhī na huā