Tags-Hawa

nafrat kī shuāoñ kī yalġhār hai har jaañ par
jis qalb meñ bhī jhāñko kumhlāyā huā sā hai

ilhād kā hamla hai 'jāved' har ik jānib
aalam kā ye aalam hai paglāyā huā sā hai

ulajh rahā hai koī sitāra tilism-e-istaḳhr-o-nainvā se
ki rabb-e-''ra.a'' ke muqāble meñ huā hai jo surḳh-rū vahī hai

havā daraḳhtoñ se kahtī hai dukh ke lahje meñ
abhī mujhe ka.ī sahrāoñ se guzarnā hai

kahūñ to kis se kahūñ aa ke ab sar-e-manzil
safar tamām huā ham-safar nahīñ aayā

sāya-e-zulf kabhī aur kabhī dāman kī havā
us ke altāf-o-karam yaad na aa.e kyā kyā

havā ne dosh se jhaTkā to aab par Thahrā
maiñ kuchh bhañvar meñ girā kuchh habāb par Thahrā

terī qurbat meñ ye pardes se aayā huā shaḳhs
chhoḌ kar tujh ko kahīñ aur bhī jā saktā hai

maiñ daraḳhtoñ pe koī naam nahīñ likh saktā
jo havā kī tarah aayā hai vo jā saktā hai

ik silsila-e-dār-o-rasan phailā huā hai
minjumala ḳhatāoñ ke hai sāhab-nazarī bhī

auroñ par asar kyā huā us hosh-rubā kā
bas itnī ḳhabar hai mirā īmān gayā hai

havā uḌaa.e unheñ aur kahīñ bhī le jaa.e
ye Tiile ret ke pakkī nishāniyāñ to nahīñ

havā ke paas amānat haiñ sab sadā-o-aks
abhī giraft se bāhar haiñ par nihāñ to nahīñ

munjamid raushnī phūTī thī kisī chādar se
maiñ ne kal abr se chhantā huā dekhā saaya

ek mire aañkh jhapakne kī zarā der thī bas
vo qarīb aatā huā duur kahīñ se niklā

sho.ala shamīm-e-zulf se aage baḌhā nahīñ
sahrā kī jaltī ret meñ ThanDī havā nahīñ

mauj-e-reg sarāb-e-sahrā kaise bantī hai
bahtā huā ā.īna-e-dariyā kaise bantī hai

tīra-rañgoñ ke huā haq meñ ye tap karnā davā
tīrgī jaatī rahī chehre kī aur upchī safā

ashk-e-garm o āh-e-sard āshiq ke ta.iiñ vasvās kar
ḳhuub hai parhez jab ho muḳhtalif āb-o-havā

kitnā saada thā vo imkāñ kā nasha
ek jhoñke ko havā likh denā