Tags-Hawa

jis havā ne mujhe jalā.e rakhā
phir usī ne bujhā diyā mujh ko

surḳh-rū kaun huā kūcha-e-jānāñ meñ kabhī
nāmvar bhī hue badnām tumheñ kyā ma.alūm

lagtā hai in dinoñ ke hai mahshar-ba-kaf havā
haiñ sar-ba-kaf charāġh to ḳhanjar-ba-kaf huā

jab se chaman meñ rakkhā hai bulbul ne āshiyāñ
sho.ala-ba-kaf hai barq to aḳhgar-ba-kaf havā

ruḳhsār-e-gul ke til se haiñ hairān ḳhushbueñ
hai mausam-e-bahār meñ ambar-ba-kaf huā

ilm-o-amal se hotī hai kirdār kī parakh
elaan kar rahī hai ye mahzar-ba-kaf havā

fir.aun aur abrha jaisoñ se bārhā
har haal hī meñ nibTī hai lashkar-ba-kaf havā

e.ajāz sher-e-haq kā dikhāne ke vāste
azhdar ba-kaf huī kabhī ḳhaibar-ba-kaf havā

gulshan meñ mustaqil jo Thikānā nahīñ milā
sahrā navard ho ga.ī bistar-ba-kaf havā

dīvān-e-be-nuqat se hai terā 'vaqār-hilm'
kahtī hai ahl-e-fan se ye gauhar-ba-kaf havā

yuuñ kisī kā pyaar āġhosh-e-havas meñ jā chhupā
koī lāsha jis tarah lipTā huā kam-ḳhāb meñ

rahmat-e-yazdāñ se māñgī ham ne do chhīñToñ kī bhiik
vo huā jal-thal ki bastī bah ga.ī sailāb meñ

na chiḌiyoñ kī koī aahaT na jhoñke hī havā ke haiñ
bahut lagtā hai Dar mujh ko nagar vīrān hogā kyā

falak huā mehrbāñ phire din shab-e-visāl aa ga.ī to is ne
bahār-e-lutf-o-karam dikhā kar naqāb-e-sharm-o-hayā uThā kar

suno raste meñ ik jaltā huā sahrā bhī aa.egā
kaho kab tak hamāre saath chalne kā irāda hai

maiñ choT kar to rahā huuñ havā ke māthe par
mazā to jab thā ki koī nishān bhī paḌtā

use na dekh mahaktā huā gulāb hai vo
na jaane kitnī nigāhoñ kā intiḳhāb hai vo

mulk se rishta hamārā hai kuchh aisā hī 'atīq'
jism kā jaise huā kartā hai rishta jaan se

tum ruk ga.e pa sañg kā mela na kam huā
is kārvāñ ke saath musāfir baḌe rahe

mere badan pe sirf havā kā libās thā
terī qabā meñ chāñd sitāre jaḌe rahe