Tags-Hawa

jo aaj siine ke ek kone meñ ḳhāmushī se paḌā huā hai
ye dil surayyā ke paar duniyā meñ paañv dhartā javāñ huā thā

nahīñ achambhe kī baat koī jo tujh pe 'mumtāz' mar miTā hai
ye shaḳhs pahle bhī terī paa.el pe martā martā javāñ huā thā

tab se ajiib sog meñ Duubā huā hai dil
kuchh ḳhvāhishoñ ne jaan jo haarī hai jism meñ

vo ab bhī sāya-e-abr-e-ravāñ ko takte haiñ
jinheñ zamāna huā apnā ghar jalā.e hue

ek gul-rū par huā dil daaġh daaġh
phuul laa.e aaj ham gulzār se

maiñ ḳhud sikhā rahā huuñ sitam kī adā unheñ
duniyā meñ kab huā koī mujh sā jafā-pasand

rakh deñge ā.īne ke barābar ham apnā dil
yā to ye nā-pasand huā un ko yā pasand

na maiñ havā meñ na ḳhaak meñ huuñ na aag meñ huuñ na aab meñ huuñ
shumār merā nahīñ kisī meñ agarche maiñ bhī hisāb meñ huuñ

jo bhes apnā badal ke aayā to rañg-e-itlāq muñh se dhoyā
kiyā hai paanī meñ qaid mujh ko havā kī sūrat habāb meñ huuñ

jo haal pūchho to ik kahānī nishān pūchho to be-nishānī
vo zarra huuñ jo miTā huā huuñ agarche maiñ āftāb meñ huuñ

tum ek phuul
apnī zaat se khilā huā

maiñ huuñ dīvār pe likkhā huā kab se lekin
koī paḌhtā nahīñ raste se guzarne vaalā

adāvateñ thiiñ mohabbateñ thiiñ na jaane kitnī hī hasrateñ thiiñ
magar phir aisā huā ki sab kuchh maiñ ḳhud hī dil se nikāl aayā

guloñ ke chehre khile hue haiñ havā meñ ḳhush-bū mahak rahī hai
ye merī āñkhoñ ne ḳhvāb dekhā ki sail-e-husn-o-jamāl aayā

kitne ḳhvāboñ ko nichoḌā hai to un āñkhoñ se
aaj Tapkā hai ye jaltā huā aañsū yaaro

tez havā aur shab-bhar bārish
indr chup aur bāhar bārish

mirī ḳhvāhish ke jitnā kab huā mujh meñ sarābāñ
ki bahr-e-dasht ke kaun-o-makāñ meñ din nahīñ thā

jo iltihāb-e-ātish-e-ġham se hai nāla-kash
vo dil nahīñ chaTaḳhtā huā ik sipand hai

kyā huā ham se jo duniyā bad-gumāñ hone lagī
apnī hastī aur bhī nazdīk-e-jāñ hone lagī

kahāñ ye taab ki chakh chakh ke yā girā ke piyūñ
mile bharā huā sāġhar to DagDagā ke piyūñ