Tags-Hawa

saaf dil ho gar hai tujh kuuñ ḳhvāhish-e-tark-e-havā
āb-e-ā.īna upar aatā nahīñ hargiz habāb

chāñdnī-rāt thī sard havā se khiḌkī bajtī thī
un hāthoñ meñ haath the mere aur december thā

maiñ ġham kī aag meñ ḳhāvar na jal ke raakh huā
vagarna maiñ bhī chamaktā kisī nagīñ kī tarah

huā hai zulf se gustāḳh kis qadar shāna
hamāre paas bhī dast-e-burīda honā thā

chhāne hoñge sahrā jis ne vo hī jaan sakā hogā
miTTī meñ ham jaise mile haiñ kam koī ḳhaak huā hogā

nisār-e-dost hai ye motiyoñ kā be-bahā maalā
har ik aañsū ko ham TuuTā huā ik dil samajhte haiñ

paḌā huā huuñ shaam se maiñ usī bāġh-e-tāza meñ
mujh meñ shāḳh nikal aa.ī hai raat kī raanī kī

raqs ab ḳhatm huā maut kī vaadī meñ magar
kisī paa.el kī sadā ruuh meñ tābinda hai

maiñ apne harf-e-malāmat kā ḳhud shikār huā
ki ghar meñ aag lagī jis se thā vo ghar kā charāġh

ik aane vaale kā hai kab se intizār use
kaho havā se bujhā.e na us ke dar kā charāġh

daraḳhtoñ kī baġhāvat hai ki ye mausam kī be-rahmī
ki jañgal aah bhartā hai havā ḳhāmosh rahtī hai

zarā sī baat se manzar badal bhī saktā thā
jo hādisa huā bastī meñ Tal bhī saktā thā

sar-phirī pāgal havā kā tez jhoñkā aa.egā
hasratoñ ke ḳhushk pattoñ ko uḌā le jā.egā

ḳhusrav-e-aish-e-vasl-e-yār jāñ-kanī aur kohkan
apnā jigar to ḳhuuñ huā ishq ke imtiyāz meñ

raushnī se bharā huā ik shaḳhs
shahr bhar ke diye jalātā hai

ishq aḳhbār kab kā band huā
dil mirā āḳhirī shumāra hai

tund jhoñke sab uḌā le jā.eñge
shāḳh se TuuTā huā pattā hai kyā

sunā huā hai jahāñ meñ be-kār kuchh nahīñ hai so jī rahe haiñ
banā huā hai yaqīñ ki is rā.egānī se kuchh aham banegā

dariyā ke paas dekho kab se khaḌā huā hai
ye kaun tishna-lab hai paanī se Dar rahā hai

hai koī jo batā.e shab ke musāfiroñ ko
kitnā safar huā hai kitnā safar rahā hai