Tags-Heritage

virāsat huuñ maiñ ik Dhaltī huī tahzīb kī 'sārim'
kahīñ khoyā gayā huuñ maiñ kahīñ paayā gayā huuñ maiñ

ranj yuuñ rāh-e-masāfat meñ mile
kuchh kamā.e kuchh virāsat meñ mile

mirī virāsat meñ jo bhī kuchh hai vo sab isī dahr ke liye hai
ye rañg ik ḳhvāb ke liye hai ye aag ik shahr ke liye hai

us ne sauñpī thī jo beToñ ko virāsat meñ kabhī
aaj afsūñ ki TukḌe usī jāgīr ke hai

jo pyāse ho to apne saath rakkho apne bādal bhī
ye duniyā hai virāsat meñ kuaañ koī nahīñ degā

din virāsat meñ mujhe raushnī de jaatā hai
vo diyā huuñ ki sar-e-shām hī jal jaatā huuñ

sochiye gar use har-nafas maut hai kuchh mudāvā bhī ho be-hisī ke liye
sūrajoñ kī virāsat milī thī hameñ dar-ba-dar ho ga.e raushnī ke liye

likkhā hai thoḌī naam kisī kā havāoñ par
ye dhuup bhī kisī kī virāsat to hai nahīñ

duniyā kahāñ thī pās-e-virāsat ke zimn meñ
ik diin thā so us pe luTā.e hue to haiñ

har jīvan kī vahī virāsat aañsū sapnā chāhat mehnat
sāñsoñ kā har bojh barābar jitnā terā utnā merā

is rañg-e-taġhazzul pe 'alī' chhāp hai merī
ye zauq-e-suḳhan mujh ko virāsat meñ milā hai

dard-virāsat pā lene se naam nahīñ chal saktā
ishq meñ baabā ek janam se kaam nahīñ chal saktā

ham ḳhush haiñ hameñ dhuup virāsat meñ milī hai
ajdād kahīñ peḌ bhī kuchh bo ga.e hote

ḳhuun hī ḳhuun thā darbār kī dīvāroñ par
qābiz-e-taḳht-e-virāsat kī riyā-kārī thī

virāsat meñ 'nasīm' is se baḌī jāgīr kyā hogī
maiñ dil kī dhaḌkanoñ meñ apnī maañ kā pyaar le aayā

tabdīl huī kaise har ik ghar kī virāsat
dar par hai koī naam pas-e-dar hai koī aur

miT jaane ke āsār virāsat meñ mile haiñ
girte dar-o-dīvār virāsat meñ mile haiñ

kab talak sar pe virāsat kī ridā le ke chaleñ
kyuuñ na ab ham ko koī sāya-e-dīvār mile

afkār kī aqlīm virāsat hai hamārī
aur is ke sivā ham ko mayassar nahīñ kuchh bhī

hai dosh pe kitne hī zamānoñ kī virāsat
har-gām pe ik bār-e-garāñ le ke chale ham