Tags-Heritage

mujhe virāsat-e-ġham se bhī aaq kar Daalā
ye kaisā lutf ki ab ro nahīñ sakūñgā maiñ

maañ baap kā manzūr-e-nazar hote hue bhī
mahrūm-e-virāsat huuñ pisar hote hue bhī

ye kaale nishāñ merī virāsat meñ nahīñ haiñ
āñkhoñ ke gaḌhe haiñ jo ye ro ro ke paḌe haiñ

sauñpoge apne ba.ad virāsat meñ kyā mujhe
bachche kā ye savāl hai gūñge samāj se

paanī hai sarāboñ se virāsat meñ
vo ḳhaak jo dāmān-e-nazar meñ hai

ye zehānat jo virāsat kī atā hai 'shāhid'
koī dīvār uThātī hai to dar rakhtī hai

hameñ shab kāTne kā fan virāsat meñ milā ham ne
kabhī patthar pakā.e haiñ kabhī sapne ubāle haiñ

milī haiñ mujh ko virāsat meñ kuchh ajab qadreñ
samāj ne diye haiñ kāġhzī se phuul mujhe

ummīd-e-sahar bhī to virāsat meñ hai shāmil
shāyad ki diyā ab ke jalā.egā koī aur

maiñ virāsat meñ milā tāj-mahal huuñ us ko
mujh ko hāregī to tasḳhīr kā dukh samjhegī

ai 'jalīs' ab ik tumhīñ meñ ādamiyat ho to ho
ibn-e-ādam ho yahī jin-e-virāsat ho to ho

duniyā kahāñ thī pās-e-virāsat ke zimn meñ
ik diin thā so us pe luTā.e hue to haiñ

ye phuul mujhe koī virāsat meñ mile haiñ
tum ne mirā kāñToñ bharā bistar nahīñ dekhā

taqsīm phir huī hai virāsat kuchh is tarah
ik maañ zamīñ pe dekhiye phir dar-ba-dar huī

ik virāsat kī tarah gaañv kī guḌ sī bāteñ
gaThḌiyāñ bāñdh ke is dil ke nagar aatī haiñ

ham āñkhoñ meñ aañsū nahīñ laate haiñ ki ham ne
paa.ī hai virāsat meñ adā aur tarah kī

apne har jurm ko purkhoñ kī virāsat kah kar
aib ko riit batātā hai batāne vaalā

nahīñ hai ghar meñ maal o zar to kyā ġham
virāsat meñ magar qarze na rakhnā

ab is se baḌh ke kyā ho virāsat faqīr kī
bachchoñ ko apnī bhiik ke pyāle to de gayā

sochiye gar use har nafas maut hai kuchh mudāvā bhī ho be-hisī ke liye
sūrajoñ kī virāsat milī thī hameñ dar-ba-dar ho ga.e raushnī ke liye