Tags-Heritage

virāsat saarī apne naam kar lī
magar us ne mujhe bhaa.ī to jaanā

mere purkhoñ kī virāsat kā bharam rahne de
tū havelī ko khulā dekh ke andar mat jā

shahr merī majbūrī gaañv merī aadat hai
ek sāneha mujh par ik mirī virāsat hai

likhī hai maiñ ne apne haath par tahrīr-e-ā.inda
mirī apnī virāsat hai qalam apnā davāt apnī

mirī virāsat meñ jo bhī kuchh hai vo sab isī dahr ke liye hai
ye rañg ik ḳhvāb ke liye hai ye aag ik shahr ke liye hai

shāmil mirī tahzīb meñ hai haq kī himāyat
andāz-e-baġhāvat kā virāsat meñ milā hai

savād-e-shahr meñ thoḌī sī ye jo jannat hai
hamāre ahd ke namrūd kī virāsat hai

ye tishnagī to milī hai hameñ virāsat meñ
hamāre vāste dariyā koī udaas na ho

ye makāñ kis kī virāsat hai hameñ kyā mālūm
sahn apnā hai to dālān kisī aur kā hai

film taqsīm-e-virāsat kā yahī the-end hai
dard kuchh aisā thā jo gardan dabāne se gayā

zabūn-o-ḳhvār huī hai mirī jibillat bhī
mire nasīb-o-virāsat meñ se imāmat bhī

kab talak sar pe virāsat kī ridā le ke chaleñ
kyoñ na ab ham ko koī sāya-e-dīvār mile

milī ho jis ko virāsat meñ umr-bhar 'sājid'
vo ḳhush-nasīb kisī ḳhāk-dāñ meñ koī nahīñ

zarā sī umr adāvat kī lambī fehristeñ
ajiib qarz virāsat meñ mere naam huā

jin buzurgoñ kī virāsat ke amiiñ haiñ ham log
un kī qabroñ ne kabhī shahr badalne na diyā

ye phuul mujhe koī virāsat meñ mile haiñ
tum ne mirā kāñToñ bharā bistar nahīñ dekhā

usī kā nuur virāsat hai ibn-e-ādam kī
vo zindagī jise kahte haiñ ham sahar kā charāġh

haañ yahī miTTī virāsat hai mire ajdād kī
lauT kar apnī kamā.ī bhī yahīñ rakkhūñgā maiñ

bech diyā gul-dān virāsat kā us ne
bhaa.ī mirā ab gamlā DhūñDhtā rahtā hai

rañj yuuñ rāh-e-masāfat meñ mile
kuchh kamā.e kuchh virāsat meñ mile