Tags-Hijr

vo to kabhī bedārī meñ juz-ḳhvāb nahīñ milte yaaro
koī hameñ hargiz na uThānā hijr ke maare sote haiñ

hijr meñ tere shams o qamar kī aañkh lage kyā lail-o-nahār
charḳh ke kab gahvāre meñ ye ishq ke maare sote haiñ

had ho koī to sabr tire hijr par kareñ
āḳhir ham ek haal meñ kab tak basar kareñ

vo aa rahā thā magar maiñ nikal gayā kahīñ aur
so zaḳhm-e-hijr se baḌh kar azaab maiñ ne diyā

kam se kam ye phone hī kā silsila baaqī rahe
hijr mushkil hai magar kuchh is meñ āsānī bhī ho

hijr meñ guzrī hai us raat kī bāteñ na karo
aap tajdīd-e-mulāqāt kī bāteñ na karo

kaash ye ā.īna-e-hijr-o-visāl
TuuT jaa.e mujhe andhā kar ke

kaaTī hai bekalī se shab-e-hijr-e-gul-ruḳhāñ
Tuk aañkh lag ga.ī hai sabā ham ko mat jagā

vasl ko ḳhud pe oḌh ke 'ansar'
hijr kī dāstāñ likhī maiñ ne

rote rote hijr meñ suuje haiñ ye chashmān-e-tar
jism lāġhar ho gayā tayyār āñkheñ ho ga.iiñ

bazm-e-ḳhayāl meñ tire husn kī sham.a jal ga.ī
dard kā chāñd bujh gayā hijr kī raat Dhal ga.ī

hijr-e-derīna se ab ḳhush the bahut maiñ aur vo
ab magar fāsle bezār hue jaate haiñ

sher-goī tirā mansab to nahīñ tifl-e-suḳhan
haañ magar hijr meñ do chaar hue jaate haiñ

hijr meñ dam ghuTne ko hai kuuch hai tafrīh kā
saañs rukne ko hai hichkī chand baar aane ko hai

fart-e-be-ḳhvābī se haiñ shab-hā-e-hijr-e-yār meñ
juuñ zabān-e-sham.a dāġh-e-garmi-e-afsāna ham

thā ḳhār-e-jigar hijr meñ tanhā ġham-e-dūrī
haiñ āfat-e-jāñ vasl meñ ab sharm-o-hayā do

ilāhī kab sahar hogī shab-e-hijr
qayāmat kī ghaḌī hai jo ghaḌī hai

hijr ke din to hue ḳhatm baḌī dhuum ke saath
vasl kī raat hai kyuuñ marsiya-ḳhvānī kareñ ham

vasl ne mere tashaḳhḳhus ko sambhāle rakkhā
hijr-o-vahshat se kabhī pūchh zarā kaun huuñ maiñ

lazzat-e-hijr ne taḌpāyā bahut rusvā kiyā
toḌ kar pheñkā mire zabt ko gum-gashta kiyā