Tags-Hijr

terī hī tarah ab ye tire hijr ke din bhī
jaate nazar aate haiñ magar kyuuñ nahīñ jaate

hijr meñ ho gayā visāl kā kyā
ḳhvāb hī ban gayā ḳhayāl kā kyā

raushan hai shab-e-hijr ba-andāz-e-ta.alluq
vo mehr-e-nazar dāġh-e-judā.ī nahīñ detā

rafta rafta huā āḳhir ke ta.iiñ ko muflis
naqd ko umr kī maiñ hijr meñ khotā khotā

jo ġhazal aaj tire hijr meñ likkhī hai vo kal
kyā ḳhabar ahl-e-mohabbat kā tarāna ban jaa.e

tū mubtalā-e-ishq hai ġham kā nisāb DhūñD
unvān jis kā hijr ho aisī kitāb DhūñD

tumhāre hijr meñ guzre hue sabhī lamhe
mirī kitāb mire aa.ine meñ rakkhe haiñ

hijr kī āñkhoñ se āñkheñ to milāte jā.iye
hijr meñ karnā hai kyā ye to batāte jā.iye

balā jaane kisī kī hijr meñ is dil pe kyā guzrī
kare sayyād kyuuñ parvā kisī bismil pe kyā guzrī

shab-e-visāl hai bisāt-e-hijr hī ulaT ga.ī
to phir kabhī ḳhayāl-e-māh-o-sāl bhī na aa.egā

mirī suḳhan-sarā.iyoñ kā e'tibār to nahīñ
jo tū nahīñ to hijr kā savāl bhī na aa.egā

tire hijr meñ chāñd ko gahan lagā
mirā rañg huā hai siyāh piyā

ghabrā ga.e betābi-e-dil dekh ke ai jaan
Thahro to abhī hijr meñ kyā kyā na kareñge

charke vo diye dil ko mahrūmī-e-qismat ne
ab hijr bhī tanhā.ī aur vasl bhī tanhā.ī

galiyoñ meñ khaḌe ho ke tirī raah takūñ maiñ
zanjīr tire hijr kī pairoñ meñ paḌī hai

dil kī tanhā.ī meñ vahshat kī darāḌeñ haiñ 'sa.īd'
ham darāḌoñ meñ tirā hijr basāne se ga.e

shab-e-vasl bhī shab-e-hijr hai shab-e-hijr ab to hai mustaqil
yahī sochne meñ huī sahar na to aa.e tum na to aa.e ham

kaisī haiñ āzmā.isheñ kaisā ye imtihān hai
mere junūñ ke vāste hijr kī ek raat bas

kahte the ham na dekh sakeñ roz-e-hijr ko
par jo ḳhudā dikhā.e so nā-chār dekhnā

aaj na ham se pūchhiye kaisā kamāl ho gayā
hijr ke ḳhauf meñ rahe aur visāl ho gayā