Tags-Hijr

hijr meñ jab ḳhayāl-e-yār aayā
lab pe naala hazār baar aayā

pur-sukūñ hijr sā.ateñ dekhūñ
vasl lamhe azaab hone lage

hai vahshatoñ kā safar musalsal
baḌhā junūñ hijr kī sazā se

vasl meñ hijr kā Dar yaad aayā
ain jannat meñ saqar yaad aayā

do mashġhale aziiz haiñ is hijr-zād ko
bistar pe leTnā kabhī pañkhe ko ghūrnā

dil lage hijr meñ kyuuñ kar merā
dil tirā sā nahīñ patthar merā

ik ḳhālī chāñd hī lab-e-jū rakhnā thā
us ke hijr kā ye bhī pahlū rakhnā thā

apne hī aks ko paanī meñ kahāñ tak dekhūñ
hijr kī shaam hai koī to lab-e-jū aa.e

use batāyā nahīñ hijr meñ jo haal huā
jo baat sab se zarūrī thī vo chhupā gayā huuñ

ek sunahre hijr ne mujh se
kitnā sabz visāl kiyā thā

mahmil-e-lailā ke pīchhe gard thī aur qais thā
is sarāb-e-ārzū meñ hijr kī izzat ga.ī

sadma-e-hijr uThānā mushkil
jaan denā to hai āsān bahut

kitāb-e-hijr meñ maiñ ab likhūñgā vasl ke qisse
mohabbat meñ milā hai jo mujhe tāvān miTTī hai

marham-e-hijr thā ajab iksīr
ab to har zaḳhm bhar gayā hogā

siina ke tabaq meñ hai kabāb-e-dil-e-pur-soz
jis din se ġham-e-hijr hai mehmān hamārā

dekh qāsid ko mire yaar ne pūchhā 'tābāñ'
kyā mire hijr meñ jiitā hai vo ġhamnāk hanūz

hijr achchhā hai na ab us kā visāl achchhā hai
is liye aur kahīñ ishq laḌā kar dekho

hijr meñ dil kā dil-shikan aalam
jo idhar hai udhar na ho jaa.e

hijr kī raat ye har Dūbte taare ne kahā
ham na kahte the na ā.eñge vo aa.e to nahīñ

tire kushta-e-ġham kā hai haal batar yahī kahiyo jo jaanā ho terā udhar
tujhe qāsid-e-mauj-e-nasīm-e-sahar mirī hijr kī shab kī bukā kī qasam