Tags-Hijr

kahāñ hai hijr meñ rahne kā tajraba us ko
tamām umr duā māñgtā rahegā vo

itnī tavīl o sard shab-e-hijr thī 'nasīm'
kitnī hī baar jāgnā sonā paḌā mujhe

malūl dekh ke tujh ko maiñ ruk na jā.ūñ kahīñ
ḳhudārā! hijr kī shiddat ko āñsuoñ meñ na Daal

bātoñ meñ guzarte hijr ke din ai kaash ki donoñ mil jaate
ham se hai dil-e-nākām ḳhafā āzurda dil-e-nākām se ham

ye raat bhayānak hijr kī hai kāTeñge baḌe ālām se ham
Talne kī nahīñ ye kaalī balā samjhe hue the shaam se ham

kaun kahe kis samt hai terī raushniyoñ kī raah
har jānib be-nūr khaḌī hai hijr kī shahr-panāh

kis se pūchheñ ki vasl meñ kyā hai
hijr meñ kyā nahīñ ki tum se kaheñ

kab tak uḌā.ūñ hijr meñ dāman kī dhajjiyāñ
ai sub.h tere chāk-garebāñ ko kyā huā

sub.h par vasl kī Thahrī hai shab-e-hijr tire
jāveñ jaldī se guzar chaar pahar aur kahīñ

kurra-e-hijr se honā hai numūdār mujhe
maiñ tire ishq kā inkār uThāne lagā huuñ

hijr kī raat nahīñ Dhalne kī
ab charāġhoñ ko ijāzat diije

ziist ne murda banā rakkhā thā mujh ko hijr meñ
maut ne dikhlā diyā aa kar masīhā.ī kā rañg

tumhārā hijr ġhanīmat hai aise mausam meñ
tumhāre vasl ke lamhe niDhāl karte haiñ

jo haqīqat meñ mirā dushman-e-jāñ hai 'ishrat'
hijr us kā bhī gavāra nahīñ hogā mujh se

hijr meñ sochā thā ab dil ko pakkā kar leñge lekin
vasl ke va.ade dil ke aahan ko sayyāl banāte haiñ

evaz davā ke duā de gayā tabīb mujhe
kahā jo maiñ ne ġham-e-hijr se do-chār huuñ maiñ

na rahī be-ḳhudi-e-shauq meñ itnī bhī ḳhabar
hijr achchhā hai ki 'mahrūm' visāl achchhā hai

chāñd bhī hai sogvār-e-hijr dost
phīkī phīkī chāñdnī hai āj-kal

hijr ke din yuuñ hī guzarte haiñ
maah jaate haiñ saal aatā hai

hai bajā terī judā.ī meñ to mar jaanā thā
maiñ magar hijr meñ bhī vasl se vābasta huuñ