Tags-Hijr

hijr ke bādal chhaTe to vasl kī taqvīm meñ
dil huvaidā ho rahā hai gulsitānī rañg kā

ham apne chehre pe apnā hī dukh nahīñ rakhte
sab ahl-e-hijr ke haiñ goshvāre āñkhoñ meñ

ho gayā huuñ nā-tavāñ aisā tumhāre hijr meñ
toḌnā mushkil huā hai āñsuoñ ke taar kā

kitne kan.ān hue ḳhvāb-e-zuleḳhā meñ asiir
kitne yāqūb rahe hijr ke sadmāt meñ gum

damaktā hijr āñkhoñ se hai ik mahtāb kī mānind
musalsal aag meñ jalnā hai to be-nūr hī achchhe

ki iizā hijr kī dekhī kahāñ thī
faqat terī badaulat dekh lī hai

hijr kī shab yuuñ thapak thapak kar mujh ko sulā.e terī yaad
jaise maañ kī lorī sun kar ik bachcha so jaa.e hai

allāh allāh surūr-e-yād-e-habīb
ab mujhe hijr kā gumāñ bhī nahīñ

dil hijr meñ jaa.e yā ki jī jaa.e
jis kā jī chāhe vo abhī jaa.e

surūr-e-hijr ke mausam meñ bhī na maañd paḌā
havās zabt ke aalam meñ bhī bahakte rahe

koī to dasht samundar meñ Dhal gayā āḳhir
kisī ke hijr meñ ro ro ke bhar gayā thā maiñ

tujh hijr meñ dil kī fuġhāñ suuñ aañkh na.iiñ lagtī kabhī
kamḳhvāb hai maḳhmal mirā shab-e-tār kī saugand hai

ye log ishq meñ sachche nahīñ haiñ varna hijr
na ibtidā na kahīñ intihā meñ aatā hai

jigar meñ hijr kī kal chubh rahī thiiñ kuchh fāñseñ
magar jo ġhaur se dekhā tirī nigāheñ thiiñ

kaisā manzar hai tire hijr ke pas-e-manzar kā
reg-e-sahrā hai ravāñ aur havā sākin hai

bhulā deñ yā kareñ ham yād-e-ġham yuuñ bhī hai aur yuuñ bhī
kisī ke hijr meñ ḳhud chashm-e-nam yuuñ bhī hai aur yuuñ bhī

yuuñ bhī guzreñgī tire hijr meñ rāteñ merī
chāñd bhī jaise mire siine meñ ḳhanjar hogā

vahshat-e-dard-e-hijr ne ham ko jagā jagā diyā
niiñd kabhī jo aa ga.ī ThanDī huā ke saath saath

aise hijr ke mausam kab kab aate haiñ
tere alāva yaad hameñ sab aate haiñ

ik tire hijr kī mī.ād ki kaaTe na kaTe
ik tire vasl kā lamha ki Thahartā hī nahīñ