Tags-Hijr

jo visāl-o-hijr se duur hai jo karam sitam se hai be-ḳhabar
kuchh uThā huā hai vo dard bhī kuchh uThī huī vo nazar bhī hai

ye visāl-o-hijr kī bahs kyā ki ajiib chiiz hai ishq bhī
tujhe pā ke hai vahī dard-e-dil vahī rañg-e-zaḳhm-e-jigar bhī hai

hijr ko shauq-e-mudāvā hī samajh kar jī leñ
zindagī tujh se ulajhne kā to yaarā hī na ho

ajab thī hijr kī saa.at ki jaañ pe ban aa.ī
kaḌā thā vaqt vo dil par magar guzar bhī gayā

oḌh letī huuñ hijr bistar par
apnī ḳhasta-tanī bichhātī huuñ

hijr kī shab se bahut duur sar-e-matla-e-shauq
ab ke tanhā.ī meñ vo mujh se milā pahlī baar

afsos mujh ko is pe sazā hijr kī milī
maiñ ne likhā thā naam tumhārā bahut ġhalat

taḌap kar shab-e-hijr meñ kyuuñ na ro.uuñ
chamaktī hī barq abr aa.e hue haiñ

ab aa bhī jaao ki ik dūsre meñ gum ho jaa.eñ
visāl-o-hijr kā qissa bahut purānā huā

din guzrā aur shaam Dhalī phir vahshat le kar aa.ī raat
jab bhī us kā hijr manāyā ham ne vo kahlā.ī raat

husn kī daulat us kī hai aur vasl kī ishrat bhī us kī
jis ne pal pal hijr meñ kaaTā jaur sahe dukh jhele haiñ

vahshat-e-hijr bhī tanhā.ī bhī maiñ bhī 'anjum'
jab ikaTThe hue sab ek ġhazal aur kahī

vahī hijr dushman-e-vasl hai vahī marg-o-zīst meñ fasl hai
vahī apne shaġhl se shaġhl hai vahī apne kaam se kaam hai

kaun rotā hai yahāñ raat ke sannāToñ meñ
mere jaisā hī koī hijr kā maarā hogā

kabhī to vasl kī chāragarī bhī kaam aa.egī
abhī to hijr marham hai abhī tū nam na kar āñkheñ

vasl kā aalam ki jaise hoñ shafaq kī lāliyāñ
hijr kā māhaul hai qurbat ke jaadū kī tarah

ye kaun pāltā phirtā hai hijr kā aaseb
mujhe batāyā gayā thā ki mar chukā huuñ maiñ

tumhārā hijr mire saath rahnā chāhtā hai
use batāo ki is se bahut baḌā huuñ maiñ

vasl kī sub.h shab-e-hijr ke ba.ad aa.ī hai
āftāb-e-ruḳh-e-mahbūb kā nazrāna liye

lamhe lamhe kī rifāqat thī kabhī vaj.h-e-nashāt
mausam-e-hijr huā ab sar-o-sāmāñ apnā