Tags-Hijr

dasht-e-pur-ḳhār meñ khīñche liye jaatā hai mujhe
har nayā ishq tire hijr meñ paatā hai mujhe

ye ham jo hijr meñ dīvār-o-dar ko dekhte haiñ
kabhī sabā ko kabhī nāma-bar ko dekhte haiñ

is manzil-e-dushvār se hans hans ke guzar jā
pagle kahīñ rone se shab-e-hijr Dhale hai

sub.h tak hijr meñ kyā jāniye kyā hotā hai
shaam hī se mire qaabū meñ nahīñ dil merā

ik hijr-zada bābul piyārī tire jāgte bachchoñ se haarī
ai shā.er kis duniyā meñ hai tū tirī tanhā duniyā ghar meñ hai

har samundar kā ek sāhil hai
hijr kī raat kā kinārā nahīñ

maiñ to ḳhāmosh rahūñ hijr meñ Dar hai lekin
dard uTh kar kahīñ āmāda-e-fariyād na ho

dil hijr ke dard se bojhal hai ab aan milo to behtar ho
is baat se ham ko kyā matlab ye kaise ho ye kyūñkar ho

hijr kī raat yaad aatī hai
phir vahī baat yaad aatī hai

hijr ke ba.ad ke manzar kā kināya huuñ koī
ik dhuāñ sā pas-e-dīvār-e-shab-e-tār huuñ maiñ

hijr-o-visāl-o-ranj-o-ġham hasrat-o-yās-o-ārzū
har shai ubhar ke aa ga.ī mub.ham se ik savāl meñ

saḳht-jānī se faqat maiñ hī rahā huuñ zinda
mar ga.e varna ġham-e-hijr se kiyā kyā āshiq

dasht kā dasht tire hijr meñ chhānā maiñ ne
paañv mere haiñ magar in meñ bhī chhāle haiñ tire

āḳhirī vaqt talak koshisheñ kar kar dekheñ
hijr ke daam meñ uljhe hue chāle haiñ tire

dard ko gurda taḌapne ko jigar
hijr meñ sab haiñ magar dil to nahīñ

shāyad us ko bhī shab-e-hijr nazar aa jaa.e
apnī palkoñ pe charāġhoñ kā dhuāñ le ke chalo

tumhāre hijr meñ jo kuchh guzar ga.ī guzrī
tumhāre vasl meñ ham ghar jalā ke baiTh rahe

hijr meñ ranj bhī karte haiñ pe itnā bhī salīm
yaar tū ne to ajab haal banā rakkhā hai

hijr nāsūr hai chup-chāp hī jhelo is ko
āh-o-zārī se ḳhatarnāk bhī ho saktā hai

aaj phir kal kī tarah hijr kī raat aatī hai
dekhiye kyā ho vahī dil hai vahī pahlū hai