Tags-Hijr

tumhāre hijr meñ ye haal ho gayā apnā
kisī kā ḳhat ho use bhī sambhāl rakhte haiñ

dil tujhe pā ke bhī tanhā hotā
duur tak hijr kā saayā hotā

tire aane se pahle jin ko murjhāne kī jaldī thī
vahī patte havā-e-hijr ne shādāb rakkhe haiñ

hijr kā baab hī kaafī thā hameñ
vasl kā baab nahīñ dekhā thā

hamāre biich ye uqda na khul sakā ab tak
kise visāl kise hijr kī zarūrat hai

ye kaisī hijr kī shab vo bhī saath chhoḌ ga.e
jo chāñd-tāre mirī chashm-e-tar ke sāthī the

tujh ko kho kar khānā piinā chhoḌ diyā
hijr ne merī bhuuk miTā dī shahzādī

huā musalmāñ maiñ aur Dar se na dars-e-vā.iz ko sun ke 'momin'
banī thī dozaḳh balā se bantī azāb-e-hijr-e-sanam na hotā

yahī nahīñ ki mujhe us ne dard-e-hijr diyā
judā.iyoñ kā diyā hai javāb maiñ ne bhī

apne lahje kī hī saḳhtī ko tasavvur kar ke
lauT aane kī shab-e-hijr meñ fariyād kare

rahtā hai roz hijr meñ zālim ke ġham mujhe
is dukh se dekhiye ki chhuTūñ haa.e kab talak

maiñ ne vasl meñ hijr kī sargoshī sun lī
aur harī chādar par kāḌhe kaale phuul

mujhe to ḳhair shab-e-hijr maar Dālegī
tumheñ to mujh se judā ho ke zinda rahnā hai

chhoḌā na ḳhauf-e-hijr ne dāman tamām raat
āġhosh-e-pur-sukūñ meñ thā dil be-qarār bhī

aañkh uThā.ī nahīñ vo sāmne sau baar hue
hijr meñ aise farāmush-gar-e-dīdār hue

na jaane hijr kī raat aur mirī siyah-baḳhtī
kahāñ kahāñ ke añdhere sameT laa.ī hai

tamāzatoñ ne ġham-e-hijr kī ujaaḌ diyā
badan thā phuul sā chehra kitāb aisā thā

kise mālūm ahl-e-hijr par aise bhī din aa.eñ
qayāmat sar se guzre aur ḳhabar shāyad na aa.e

hai jis pe mohabbat kī nazar hogā pareshāñ
ai sāna-e-gul hijr kī shab kis ke liye hai

ashk-bārī-e-shab-e-hijr kā kyā haal likhūñ
dīda-e-tar ne 'nazar' ek samundar ulTā