Tags-Hijr

jis kuuñ piv ke hijr kā bairāg hai
aah kā majlis meñ us kī raag hai

kaifiyateñ saarī thiiñ faqat hijr tak us ke
maiñ sāmne aa kar kisī hālat meñ nahīñ thā

tabsire hoñ hijr par yā vasl par
ab kahāñ ham ko hai fursat chup raho

ye batā hijr ke mausam kā mudāvā kyā hai
mujh ko andāz mohabbat ke sikhāne vaale

marīz-e-hijr kā koī ilaaj kar dekhe
asar davā se davā hukm-e-chāra-gar se phire

aadhā adhūrā hijr javānī chabā gayā
aadhe adhūre ishq meñ bachpan havā huā

dil ko saḳht betābī chashm ko be-ḳhvābī hai
hijr meñ tire zālim ye ye kuchh ḳharābī hai

ab ḳhvāb meñ bhī us zālim ko bas hijr kā saudā rahtā hai
ai jazba-e-dil tū kis ke liye ye phuul aur paat banā.e hai

ham bhī us silsila-e-ishq meñ bai.at haiñ jise
hijr ne dukh na diyā vasl ne rāhat nahīñ dī

aarzū dil kī bar aa.ī na 'hasan' vasl meñ aur
lazzat-e-hijr ko bhī muft meñ kho baiThe ham

raunaqeñ vasl kī phir hijr kī vahshat haa.e
tum ne dekhe haiñ kahāñ mele mirī āñkhoñ se

go hijr ke lamhāt bahut talḳh the lekin
har baat ba-unvān-e-tarab yaad rahegī

hijr ke maal se dil-e-nādāñ
vasl kā intizām karne lagā

hijr ne daaġh dho.e āñkhoñ ke
is safā.ī se chal rahā hai dil

ishq meñ hijr kā sahārā hai
piir bhaa.ī se chal rahā hai dil

ḳhudā kare ki tirī umr meñ gine jaa.eñ
vo din jo ham ne tire hijr meñ guzāre the

dard shāyān-e-shān-e-dil bhī nahīñ
aur shab-e-hijr mustaqil bhī nahīñ

hijr kī rātoñ meñ lāzim hai bayān-e-zulf-e-yār
niind to jaatī rahī hai qissa-ḳhvānī kījiye

vo ik lamha jo tere vasl kā thā
bayāz-e-hijr par likkhā huā hai

kulfat-e-hijr ko kyā ro.uuñ tire sāmne maiñ
dil jo ḳhālī ho to āñkhoñ meñ ġhubār aa jaa.e