Tags-Hijr

mire dil ke hāthoñ se bahr-e-vafā meñ mirī zindagī meñ na ho jaa.e gaḌbaḌ
kabhī kasrat-e-rañj-o-ġham kā thapeḌā kabhī josh-e-ummīd-o-hasrat kī ojhaḌ

ain mumkin hai tire hijr se mil jaa.e najāt
kyā kareñ yaar ye sahrā nahīñ chhoḌā jaatā

hijr to hijr thā ab dekhiye kyā bītegī
us kī qurbat meñ ka.ī dard na.e aur bhī haiñ

tumhāre hijr kā sadqa utaar pheñktā hai
diler shaḳhs hai ḳhvāhish ko maar pheñktā hai

tumhāre jaane kā ġham manā.ūñgā dekh lenā
maiñ hijr-e-sahrā meñ ḳhaak uḌā.ūñgā dekh lenā

toḌā hai dam abhī abhī bīmār-e-hijr ne
aa.e magar huzūr ko tāḳhīr ho ga.ī

vāda-e-fardā pe jo Taltā rahe
vo marīz-e-hijr kab achchhā huā

hijr kī shab guzar hī jā.egī
ye udāsī to umr bhar kī hai

dil thā ek bagūlā hijr ke sahrā meñ
naach rahā thā le kar vasl kī mastī ko

hijr thā is kā bahut sabr-āzmā mere liye
ġham se patthar ho gayā lekin kabhī royā nahīñ

ab kī to hijr-e-yār meñ ham gor jhāñk aa.e
jiite haiñ to kisī se na phir dil lagā.eñge

in aate jaate roz-o-shab ki gardishoñ ko dekh kar
kisī ke hijr kā koī malāl hī nahīñ rahā

ye aarzū ki mere ishq ko mile me.arāj
namāz-e-ishq paḌhūñ hijr-e-be-karāñ dekhūñ

ai mah-e-hijr kyā kaheñ kaisī thakan safar meñ thī
ruup jo rahguzar meñ the dhuup jo rahguzar meñ thī

ye hijr kī hai aag mizāj us kā aur hai
ashkoñ se sho.alagī-e-badan aur baḌh ga.ī

sabā ye kab jalan hotī jo shām-e-hijr gul hotī
tapāñcha sham.a ko vaqt-e-sahar maarā to kyā maarā

hijr kī pyaas se jalte haiñ bagūloñ ke dahan
ḳhushk sahrāoñ ko zulfoñ kī ghaTā.eñ denā

miT ga.ī hasrat-e-dīdār bhī rafta rafta
hijr meñ hasrat-e-dīdār kahāñ tak jaatī

hijr meñ jaan hai dūbhar ye likhā thā un ko
ḳhat meñ likkhī huī marne kī ijāzat aa.ī

kuchh aur kaam to ham se na ho sakā lekin
tumhāre hijr kā ik ik azaab likkhā hai