Tags-Hijr

ham musāfir haiñ gard-e-safar haiñ magar ai shab-e-hijr ham koī bachche nahīñ
jo abhī āñ.suoñ meñ nahā kar ga.e aur abhī muskurāte palaT ā.eñge

nahīñ bhartā ye zaḳhm-e-hijr apnā
lagāo vasl kā marham azīzam

ham ne mar kar hijr meñ paa.ī shifā
aise achchhoñ kā vo mātam kyā kareñ

ḳhvāb talak rihā.ī thī tere firāq-o-hijr se
aañkh khulī to aa.ine tah meñ kahīñ utar ga.e

ai rah-e-hijr-e-nau-faroz dekh ki ham Thahar ga.e
ye bhī nahīñ ki zinda haiñ ye bhī nahīñ ki mar ga.e

din nahīñ dekhā sivā-e-shām-e-hijr
zindagī-bhar meñ yahī ik raat thī

aap hī gin deñ masā.ib hijr ke
yuuñ to kahne ke liye ik raat thī

bichhaḌte vaqt jo garje vo kaise bādal the
ye kaisā hijr ki barsāt bhī nahīñ aa.ī

āñkhoñ se dil ke diid ko maan.e nahīñ nafas
āshiq ko ain-hijr meñ bhī vasl-e-yār hai

tumhāre hijr meñ kyuuñ zindagī na mushkil ho
tumhīñ jigar ho tumhīñ jaan ho tumhīñ dil ho

kyā salīqa thā vo 'ġhālib' hoñ ki hoñ 'mīr'-o-'firāq'
hijr meñ vasl kā vo naqsh-e-gurezāñ rakhnā

ai hijr-zada shab
aa tū hī mire siine se lag jā ki bate ġham

guzār lūñgā kisī tarah hijr kī rāteñ
koī kahānī mire hāfize meñ rakh denā

mire hijr ke faisle se Daro tum
maiñ ḳhud meñ ajab hausla dekhtī huuñ

vasl ne to mujhe shiddat kī tapish meñ rakkhā
hijr thā jis ne mujhe sāya-e-dīvār diyā

hijr kī tīra-shabī Thahrī hai taqdīr-e-visāl
merī yādoñ ke sitāroñ ko jagā.e rakhnā

vo aa rahā thā magar maiñ nikal gayā kahīñ aur
sau zaḳhm-e-hijr se baḌh kar azaab maiñ ne diyā

tāq-e-jāñ meñ tere hijr ke rog sambhāl diye
us ke baad jo ġham aa.e phir hañs ke Taal diye

use ḳhabar thī ki ham visāl aur hijr ik saath chāhte haiñ
to us ne aadhā ujaaḌ rakkhā hai aur aadhā banā diyā hai

sahā jaatā nahīñ ham se ġham-e-hijr-e-musalsal
zarā sī der ko terī rifāqat chāhiye hai