Tags-Hijr

hijr kā aalam uḌā le jā.egā rañgat kahīñ
aur samundar suukh kar maidān hotā jā.egā

niiñ sair-e-lāla-zār kī āshiq kuuñ aarzū
az-bas hai dāġh-e-sīna gul-e-bostān-e-hijr

vo āshiqī kī misl meñ manzūr hai mudām
chille maiñ ġham ke baiTh jo khīñchā kamān-e-hijr

āb-e-hayāt vasl siiñ de umr-e-jāvedāñ
hai be-qarār ġham siiñ tire nīm-jān-e-hijr

pazhmurda kyuuñ na ho.e gul-e-ummīd-e-āshiqāñ
bahtī hai dil ke baaġh meñ bād-e-ḳhizān-e-hijr

zāhir agarche tāza-o-tar misl-e-lāla huuñ
mujh dil meñ jānashīn hai dāġh-e-nihān-e-hijr

jaarī ba-rāh-e-chashm satī ḳhūn-e-dil 'sirāj'
jab siiñ mire jigar meñ lagī hai sinān-e-hijr

har har varaq pe kyuuñ ki likhūñ dāstān-e-hijr
aatā nahīñ zabān-e-qalam par bayān-e-hijr

kin kin musībatoñ se huī sub.h shām-e-hijr
so zulfeñ hī banāte use raat ho ga.ī

hijr sāmāñ hai ravāñ sū-e-shab-e-vasl 'shahāb'
dhuup oḌhe hue zer-e-shajar aatā hai koī

vasl bhī hijr thā visāl na thā
mil rahe the magar ḳhayāl na thā

ham apne hijr meñ terā visāl dekhte haiñ
yahī ḳhushī kī hai sā.at, yahī malāl kī hai

tire hijr meñ mah-e-sīm-bar koī ġhaur se jo kare nazar
mirī sub.h shaam se hai batar mirā roz shab se siyāh hai

juz marg kuchh nahīñ hai tap-e-hijr kā ilaaj
ham naqsh chaaT kar hue aamil se dil uchāT

kah do ye kohkan se ki marnā nahīñ kamāl
mar mar ke hijr-e-yār meñ jiinā kamāl hai

hameñ hijr meñ ḳhuuñ rulā.egī raat
hamāre lahū meñ nahā.egī raat

vahī hai hijr kī rut kī udāsī
vahī qātil havā hai aur maiñ huuñ

na koī hijr na koī visāl hai shāyad
bas ek hālat-e-be-māh-o-sāl hai shāyad

māñgā kareñge ab se duā hijr-e-yār kī
āḳhir to dushmanī hai asar ko duā ke saath

ajiib rut hai ye hijr-o-visāl se aage
kamāl hone lagā hai kamāl se aage