Tags-Hijr

vasl aur hijr ke dariyā meñ vahī utreñ jo
is taraf Duub ke us or ubharnā chāheñ

ham hijr kī kaalī rātoñ meñ jab bistar-e-ḳhvāb pe jaate haiñ
maazī ke tamām masā.ib ik ik kar ke sāmne aate haiñ

kho ga.ī daur-e-hijr meñ 'nāyāb'
mere lail-o-nahār kī ḳhushbū

maiñ naqsh-e-hijr-e-yār huuñ shab kī fasīl par
jaltā huā charāġh banāyā gayā mujhe

sadiyoñ tak ehtimām-e-shab-e-hijr meñ rahe
sadiyoñ se intizār-e-sahar kar rahe haiñ ham

mujh sā hogā na saḳht-jāñ koī
ki shab-e-hijr meñ jiyā huuñ maiñ

hijr ke dariyā meñ tum paḌhnā lahroñ kī tahrīreñ bhī
paanī kī har satr pe maiñ kuchh dil kī bāteñ likhūñgā

hijr kī raat meñ sham-e-shabistāñ had se baḌh kar raushan thī
is hañgām meñ dil bhī jalā ho aisā bhī ho saktā hai

sitāroñ se shab-e-ġham kā to dāman jagmagā uThThā
magar aañsū bahā kar hijr ke māroñ ne kyā paayā

hijr kī rut jāñ-levā thī par ġhalat sabhī andāze nikle
taaza rifāqat ke mausam tak maiñ bhī jiyā huuñ vo bhī jiyā hai

ye mere ghar kī udāsī gavāhī degī tujhe
ki tere hijr ke dariyā ko paar kis ne kiyā

ham marte haiñ yā jiite haiñ tum shaad raho ābād raho
kyā tum se kaheñ kyā hotā hai jab hijr kī saa.at hotī hai

ye hijr kā rāsta hai jis par maiñ tanhā tanhā sī chal rahī huuñ
bas us kī yādoñ kī dhuup hai aur maiñ qatra qatra pighal rahī huuñ

dil-jalā maiñ huuñ vo āshiq ki shab-e-hijr 'qalaq'
sham.a bhī rone lagī dekh garebāñ mujh ko

hijr meñ hai kaun kitnā be-qarār
lekin in bātoñ meñ ab kyā rah gayā

ek saa.at jo tirī zulf ke saa.e meñ kaTī
hijr bar-dosh zamānoñ se kahīñ bhārī thī

kahnī hai mujh ko ek baat aap se ya.anī aap se
aap ke shahr-e-vasl meñ lazzat-e-hijr bhī ga.ī

rahe laakh sadme nafas nafas jiye kyuuñ ki koī parā.e bas
shab-e-vasl marne kī thī havas shab-e-hijr jiine kā thā qalaq

nahīñ tere phirne kā kuchh gila ki zamāna saarā badal gayā
jo shab-e-visāl meñ chain thā vahī roz-e-hijr banā qalaq

hijr ko biich meñ nahīñ chhoḌā
sab se pahle use tamām kiyā