Tags-Hijr

ehsās mirā hijr-gazīda hai azal se
kyā mujh ko agar koī qarīb-e-rag-e-jāñ hai

husn kī daulat us kī hai aur vasl kī ishrat bhī us kī
jis ne pal pal hijr meñ kaaTā jaur sahe dukh jhele haiñ

kaT ga.ī raat magar
hijr ke jāgte pairāhan se

hijr ke din kī raat huī barsāt huī
aañkh se dil kī baat huī barsāt huī

kuchh to surāġh mil sake mausam-e-dard-e-hijr kā
sañg-e-jamāl-e-yār par naqsh koī banā.iye

sone vāloñ ko kyā ḳhabar ai hijr
kyā huā ek shab meñ kyā na huā

hijr se karte haiñ nāshād hameñ vasl se shaad
ḳhud maraz dete haiñ aur aap shifā dete haiñ

toḌ deñ Dor hijr kī 'ābid'
kab talak ye vabāl khīñcheñge

jab bhī huī azān-e-vasl ham ne bichhā.ī jā-namāz
hijr kā ek pāsbāñ baḌh ke imaam ho gayā

vahī hijr hai aur vahī vasl hai
mirā tajraba bhī nayā kuchh nahīñ

dekhnā maañd na paḌ jaa.eñ ġham-e-hijr meñ ye
tum shab-e-vasl kā in āñkhoñ meñ kājal rakhnā

saal tab the pal jaise aan ab qaran sī hai
vasl ke baras vo the hijr kī ghaḌī ye hai

hijr meñ yuuñ bahte haiñ aañsū
jaise rim-jhim barse sāvan

shoḳhiyāñ haiñ ki bane hijr kī shab vasl kī raat
so rahe pher ke muñh aap badal kar karvaT

chuTkiyāñ hijr meñ letī hai shikan bistar kī
mere pahlū meñ chubho detī hai nashtar karvaT

hijr se baḌh ke shab-e-vasl aziyyat hai mujhe
ġhair kī yaad dilātī hai tirī har karvaT

jānte the ham na iizā hijr kī
vo bhī sāhib kī badaulat dekh lī

na kaTe raat hijr kī jo na ho
naala teġh-e-kashīda ke mānind

hijr kī umr baḌhī hai to ham un āñkhoñ ko
ab kisī ḳhvāb-nagar meñ nahīñ jaane deñge

hijr kī umr baḌhī hai to chalo ham ḳhud hī
naqsh sab dil se miTā dete haiñ