Tags-Hijr

nishān-e-hijr bhī hai vasl kī nishāniyoñ meñ
kahāñ kā zaḳhm kahāñ par dikhā.ī dene lagā

vasl kī shīrīnī meñ pinhāñ hijr kī talḳhī bhī hai kam kam
tum se milne kī bhī ḳhushī hai tum se judā hone kā bhī ġham

hijr o visāl ek hī lamhe kī baat thī
vo pal guzar gayā to zamāne guzar ga.e

vasl gayā to hijr thā hijr gayā to kuchh na thā
ḳhaas ke ba.ad aam hoñ aam ke ba.ad kuchh nahīñ

shab-e-hijr sahrā-e-zulmāt niklī
maiñ jab aañkh kholī bahut raat niklī

kyuuñ sakūñ nasīb haiñ hijr kī darāziyāñ
jaise pyaas bujh ga.ī jaise bhuuk mar ga.ī

mausam-e-hijr ho yā vasl kī vo raat hasīñ
'sīmā' dhaḌkā sā lagā rahtā hai Dhal jaane kā

terā va.ada hai sabab dil ke bahal jaane kā
mausam hijr meñ har phuul ke khil jaane kā

tumheñ ḳhabar hī nahīñ tum to lauT jāoge
tumhāre hijr meñ lamha bhī saal honā hai

tire ḳhayāl ko bhī fursat-e-ḳhayāl nahīñ
judā.ī hijr nahīñ hai milan visāl nahīñ

pursish-e-ġham ko ḳhud nahīñ aa.e un kā magar paiġhām to aayā
hijr kī rut meñ jān-e-hazīñ ko duur kī ye shahnā.ī bahut hai

hijr meñ din to kisī taur guzar jaate haiñ
jalne lagtī hai kabhī raat to dukh hotā hai

shab-e-hijr raushnī ho ga.ī
mire āñsūoñ kī qatār se

us kā ik pal dekhnā, us par darūd salām
hijr bharī jo zindagī ain visāl kare

hijr huuñ puurā hijr huuñ ishq visāl kare
dil kī dhaḌkan taal ho jism dhamāl kare

jaltā huuñ hijr-e-shāhid o yād-e-sharāb meñ
shauq-e-savāb ne mujhe Daalā azaab meñ

ai shab-e-hijr mujhe tū ne to dekhā hogā
merī mānind na thā subah kā taarā tanhā

nazar kā farq kahiye is ko hijr hai visāl sā
uruuj kah rahe haiñ jis ko hai vahī zavāl sā

ham hijr kī raat ke musāfir
is dasht se ham ko kyā milā hai

shikva-e-hijr pe sar kaaT ke farmāte haiñ
phir karoge kabhī is muñh se shikāyat merī