Tags-History

likkhī ga.ī tārīḳh hamārī
kuufe tere kāḳh-o-kū par

zindagī jaise calendar pe badaltī tārīḳh
maiñ shab-o-roz ke mānind guzartā jā.ūñ

juġhrāfiya thiiñ yā phir tārīḳh saarī jihatañ
ham ho ke 'farhat-ehsās' apnī jihat se nikle

ham zabt kī tārīḳh ke haiñ baab 'rashīdī'
ham zabt kī tārīḳh meñ pinhāñ nahīñ hote

tā-chand 'suhail' afsurda-e-ġham kyā yaad nahīñ tārīḳh-e-haram
īmāñ ke jahāñ paḌte haiñ qadam paidā vahīñ zamzam hotā hai

qaum par ho kar tasadduq qaum par ho kar nisār
ġhāziyān-e-qaum kī tārīḳh dohrātā huuñ maiñ

tārīḳh dil kī ḳhud naqsh-e-dil hai
khā khā ke choTeñ chaTkā nagīna

husn se chuuk huī is kī hai tārīḳh gavāh
ishq se bhuul huī hai ye mujhe yaad nahīñ

likkhā hai tārīḳh ke saf.he saf.he par ye
shāhoñ ko bhī daas banāyā jā saktā hai

surḳh kabūtar zard muñDer
ye tārīḳh likhegā kaun

merā tahzīb-o-tamaddun hai ye vahshat merī
merā qissa, mirī tārīḳh hai nisyān mirā

ai bachcho ai hañsne vaalo tārīḳh-e-mohabbat paḌh Daalo
dil vaale ke dil par qaid nahīñ har umr meñ Thokar khātā hai

gumnāmī kī galiyoñ meñ tārīḳh kahāñ tak pahuñchegī
ek tumhī suqrāt nahīñ ho aur bahut guzre hoñge

de rahe haiñ tumheñ to log rifāqat kā fareb
un kī tārīḳh paḌhoge to dahal jāoge

itne bedār zamāne meñ ye sāzish bharī raat
merī tārīḳh ke siine pe utar aa.ī thī

hurriyat zulmat-e-zindāñ meñ janam letī hai
inqilābāt kī tārīḳh hai zanjīr mirī

shor hai Dūbīñ hazāroñ azmateñ tārīḳh kī
kitnī ḳhāmoshī se bahtā vaqt kā dhārā to hai

sau ġhazleñ hotī haiñ aur mar jaatī haiñ
ik misra.a tārīḳh raqam kar detā hai

nadīm tārīḳh-e-fat.h-e-dānish bas itnā likh kar tamām kar de
ki shātirān-e-jahāñ ne āḳhir ḳhud apnī chāloñ se maat khaa.ī

kal tārīḳh yaqīnan ḳhud ko dohrā.egī
aaj ke ik ik manzar ko pahchān meñ rakhnā