Tags-History

apnī tārīḳh ke ahrāmoñ meñ utar kar dekheñ
azāb-e-musalsal kī ye fasl

nādim āñkheñ soch rahī haiñ kal tārīḳh savāl karegī
itnā qaht-e-mohabbat kyuuñ thā kyā asbāb likhe jā.eñge

ye ḳhvāb-e-sub.h kyā karte tamannā kī hinā-bandī
agar tārīḳh ne apne ko dohrāyā nahīñ hotā

har ek vāqi.a tārīḳh-dār likh jā.ūñ
ga.e dinoñ kī mire haath vo kitāb to de

dil hī nahīñ raushan to din kyā niklegā
sūraj to tārīḳh badaltā rahtā hai

use yaad thī kal kī tārīḳh shāyad
sisaktī rahī le ke hichkī udāsī

pūchh aa qātil se to vo kab karegā ham ko qatl
aaj ham tārīḳh-e-marg aap ai qazā kahne ko haiñ

raat ke ba.ad na.e din kī sahar aa.egī
din nahīñ badlegā tārīḳh badal jā.egī

hamāre ahd kī tārīḳh ham se mat pūchho
vo vāqi.āt nahīñ haiñ sunā.e jaane ke

tārīḳh kyā hai vaqt ke qadmoñ kī gard hai
qaumoñ ke auj-o-past kī ik dāstāñ hai vaqt

sirf zindāñ kī hikāyat hī pe ma.amūr nahīñ
ek tārīḳh safar kartī hai zanjīr ke saath

haavī hue fasāne haqīqat pe is tarah
tārīḳh zindagī ke havāle badal ga.e

tahzīb jahāñ tharrātī hai tārīḳh-e-bashar sharmātī hai
maut apne kaTe par ḳhud jaise dil hī dil meñ pachhtātī hai

tārīḳh meñ qaumoñ kī ubhre kaise kaise mumtāz bashar
kuchh mulk ke taḳht-nashīñ kuchh taḳht-falak ke tāj-basar

ye shart-nāma jo dekhā to elchī se kahā
use ḳhabar nahīñ tārīḳh kyā sikhātī hai

kahāñ hai tumhārā rath jo
tārīḳh se ziyāda tez chaltā hai

juġhrāfi.e ne kaaT diye rāste mire
tārīḳh ko gila hai ki maiñ ghar nahīñ gayā

ḳhud ko tārīḳh kisī vaqt jo dohrātī hai
mere hālāt pe duniyā ko hañsā jaatī hai

chhuā jise bhī vahī lafz ban gayā tārīḳh
ki be-asar koī jumla adā kiyā hī nahīñ

ye duniyā hai yahāñ tārīḳh hī dohrā.ī jaatī hai
anokhā kuchh nahīñ hotā ajab kuchh bhī nahīñ hotā