Tags-History

likkhī thī ġhazal ye āgara meñ
pahlī tārīḳh january kī

qarīb aatī jo tārīḳh us ke milne kī
vo apne va.ade kī muddat baḌhā diyā kartā

ai karb-o-balā ḳhush ho na.ī nasl ne ab ke
ḳhud apne lahū se tirī tārīḳh likhī hai

jin ko tārīḳh kī nazreñ bhī kabhī chhū na sakeñ
batn-e-gītī meñ ka.ī aise zamāne hoñge

āḳhir haiñ kaun log jo baḳhshe hī jā.eñge
tārīḳh ke harām se tauba kiye baġhair

sirf tārīḳh batāne ke liye zinda huuñ
ab mirā ghar meñ bhī honā hai calendar honā

saarī rāheñ sabhī socheñ sabhī bāteñ sabhī ḳhvāb
kyuuñ haiñ tārīḳh ke be-rabt havāloñ kī tarah

agar yaqīn nahīñ to uThā.iye tārīḳh
hamārā naam ba-sad-āb-o-tāb likkhā hai

jañg se mas.ale hal karne chale ho logo
tumheñ tārīḳh kā ek ek sabaq yaad nahīñ

mujh ko nichoḌtī rahī tārīḳh baar baar
misl-e-magas hī shahd ugaltā rahā huuñ maiñ

aaj aur kal kī baat nahīñ hai sadiyoñ kī tārīḳh yahī hai
har āñgan meñ ḳhvāb haiñ lekin chand gharoñ meñ ta.abīreñ haiñ

zabāñ tasalsul-e-tārīḳh-e-zindagānī hai
zabān manāzil-e-tahzīb kī kahānī hai

kaun tārīḳh ke is sidq ko jhuTlā.egā
ḳhair-o-shar donoñ muqayyad rahe zindānoñ meñ

dā.ere qausain san tārīḳh ādād o shumār
nuqta o zer-o-zabar tashdīd o mad

tārīḳh ke ḳhūnīñ hāthoñ se chhīnā hai tirā sīmīñ dāman
ai sub.h-e-vatan ai sub.h-e-vatan

baḌhā.egā vo apne qad ko bāñsoñ par khaḌe ho kar
kabhī tārīḳh badlegā kabhī farhañg badlegā

ab to hālat huī re.āyā sī ab vo tārīḳh kyā kaheñ 'ḳhāvar'
dil kī jo saltanat milī thī hameñ us pe kis kis ne hukmarānī kī

ishq kī tārīḳh dohrā.ī zamāne ne zarūr
naam paayā qais ne bhī tere dīvāne ke ba.ad

mirā vajūd bhī tārīḳh hai zamāne kī
mujhe bhī paḌh ke kabhī dekhte to behtar thā

tārīḳh koī ḳhāmosh zamāna hotā hai
jo sadiyoñ tak mausam kī god meñ sotā hai