Tags-History

tārīḳh-e-junūñ ye hai ki har daur-e-ḳhirad meñ
ik silsila-e-dār-o-rasan ham ne banāyā

na jaane mujh se kitne log the jo sochte ye the
ki in se ik na.ī tārīḳh kā āġhāz honā thā

abhī tārīḳh naamī ek jādūgar ko aanā hai
jo zinda shahr aur ajsām ko patthar meñ Dhālegā

tārīḳh-e-kā.enāt-e-ibādat junūñ se hai
unvān-e-aql-o-hosh hai dīvāngī kī baat

ham shahr-zādoñ kī suno
ham rāqim-e-tārīḳh-e-nau

āhaTeñ jaag ke tārīḳh ko dastak deñgī
aas ke siine meñ ek zaḳhm harā hai to sahī

'fāriġh' kaise daur meñ ye tārīḳh hameñ le aa.ī hai
apne dukh bhī sahte haiñ tārīḳh ke dukh bhī sahte haiñ

sadiyoñ kī tārīḳh yahāñ qirtās-e-havā par likkhī hai
qarnoñ ke afsāne ham se koh-o-bayābāñ kahte haiñ

kar zulm bapā lekin tārīḳh kā ye sach apne zehn meñ rakh
kitne hī zālim dafn hue mazlūmoñ kī fariyād tale

jinheñ tārīḳh bhī likhte Daregī
vo hañgāme yahāñ hone lage haiñ

jab zulm ke tūfāñ umḌe haiñ jab yaas ke bādal chhā.e haiñ
duniyā ko diyā hai azm-e-javāñ tārīḳh ko ham ne moḌ diye

radiologist un xroñ ko paḌh rahī hai
jin par merī guzishta nazm kī tārīḳh paḌī hai

jin se tārīḳh ke safhāt bhī jaag uThte the
vo zamāne vo fasāne guzarāñ dekhe haiñ

tahrīr hai ye 'ġhālib'-e-yazdāñ-parast kī
tārīḳh us kī aaj nauvīñ hai august kī

nishāñ kuchh aap bhī kar deñ huā dafn aap kā majnūñ
pa.e tārīḳh rehlat kījiye tadbīr patthar kī

bahut hoshiyār logo is na.ī tārīḳh ke hāthoñ
na jaane kab tumhārā ghar kisī kā ghar nikal aa.e

ik zabūñ-hālī to thī par tum mirī tārīḳh ko
chand hī barsoñ meñ daur-e-ibtilā tak le ga.e

saaf kitnā hī kareñ dāman-e-qātil ko halīf
lauh-e-tārīḳh pe dhabbā sā lagā rahtā hai

jis meñ aatī ho bū ta.assub kī
aisī tārīḳh kyā kare koī

paḌhā.ī jaatī hai maktab meñ ab ġhalat tārīḳh
fasādī haath meñ bachpan hai kyā kiyā jaa.e