Tags-Holi

rāt-bhar log jalāte rahe holī ke alaav
sub.h ko mil ke chale rañg uḌāne ke liye

ho ke sarshār bahut ishq se gaa.eñ holī
ik na.e rañg se apnoñ ko sunā.eñ holī

vo tamāshā o khel holī kā
sab ke tan raḳht-e-kesarī hai yaad

hamārī holī hai eid hai vo har ik ḳhushī kī umiid hai vo
vo paas aa.e to us se pūchheñ tū itne din se kahāñ thā pahle

kiyā hai va.ada to phir bazm-e-raqs meñ aanā
na kījiyo mujhe tum sharmsār holī meñ

koī parī ho agar ham-kanār holī meñ
to ab kī saal ho duunī bahār holī meñ

ye rañg paash hue haiñ vo aaj ai 'nādir'
hai farsh-e-bazm-e-tarab lāla-zār holī meñ

mujhe jo qumquma maarā to kar diyā bismil
ajiib rañg se khele shikār holī meñ

hamāre ghar meñ utāreñge raah agar bhūle
haiñ mast Dolī ke un ke kahār holī meñ

safed pairahan ab to utaar de allāh
basantī kapḌe hoñ ai gul-ezār holī meñ

phir ġhaT ġhaT bhañg kā daur chalā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

hai rāg-rañg ruup nayā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

phir daftar-e-raqs-o-rañg khilā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

tā-thayyā kī lagtī hai sadā phir dhuum machā.ī holī ne
phir Dhol bajā rañg uḌā phir dhuum machā.ī holī ne

phir shor-e-noshā-nosh uThā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

naġhme kī rut naġhme kī fazā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

har chehra hai luthḌā luthḌā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

mausam hai na khāne-pīne kā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

ūdham sā hai galiyoñ meñ machā phir dhuum machā.ī holī ne
phir Dhol bajā phir rañg uḌā phir dhuum machā.ī holī ne

holī kī jaltī aag ke din
ye rañg ke din ye raag ke din