Tags-Holi

ehsān-e-rañg ġhair uThāte nahīñ kabhī
apne lahū se khel vo holī hī kyuuñ na ho

Daal kar ġhunchoñ kī muñdrī shāḳh-e-gul ke kaan meñ
ab ke holī meñ banānā gul ko jogan ai sabā

kis kī holī jashn-e-nau-rozī hai aaj
surḳh mai se sāqiyā dastār rañg

ik taraf rāhat kā aur farhat kā kaal
ik taraf holī meñ uḌtā hai gulāl

ḳhūn-e-nāhaq hamārā uchhlegā
rañg laayā jo shoḳh holī meñ

shab jo holī kī hai milne ko tire mukhḌe se jaan
chāñd aur taare liye phirte haiñ afshāñ haath meñ

mausam-e-holī hai din aa.e haiñ rañg aur raag ke
ham se tum kuchh māñgne aao bahāne phaag ke

kyuuñ ham se ho bigaḌte ham ne to shaiḳh sāhab
holī se peshtar hī tum ko banā diyā hai

lab-e-dariyā pe dekh aa kar tamāshā aaj holī kā
bhañvar kaale ke daf baaje hai mauj ai yaar paanī meñ

nāchtī gā gā ke holī dam-ba-dam
jyuuñ sabhā indar kī dar bāġh-e-iram

ye dhuum machī ho holī kī aur aish maze kā jhakkaḌ ho
us khīñchā-khīñch ghasīTī par bhaḌve ranDī kā phakkaḌ ho

ho naach rañgīlī pariyoñ kā baiThe hoñ gul-rū rañg-bhare
kuchh bhīgī tāneñ holī kī kuchh nāz-o-adā ke Dhañg-bhare

kuchh kāfir nain maTakte hoñ tab dekh bahāreñ holī kī

mahbūb nashe meñ chakte hoñ tab dekh bahāreñ holī kī

bhaḌve bhii, bhaḌvā bakte hoñ tab dekh bahāreñ holī kī

jab phāgun rañg jhamakte hoñ tab dekh bahāreñ holī kī
aur daf ke shor khaḌakte hoñ tab dekh bahāreñ holī kī

sīnoñ se rañg Dhalakte hoñ tab dekh bahāreñ holī kī

kapḌoñ par rañg chhiḌakte hoñ tab dekh bahāreñ holī kī

jab aise aish mahakte hoñ tab dekh bahāreñ holī kī

kuchh ghuñghrū taal chhanakte hoñ tab dekh bahāreñ holī kī